SERICULTURE SECREARY IN SERCHHIP DSO OFFICE LEH SERICULTURE FARM TLAWH


Serchhip, 22nd July, 2014: Mizoram Sawrkara Sericulture Department Secretary Pi C.Zothankhumi, MSS chuan vawiin chawhnu dar 1:00 khan Serchhip Kikawn Venga District Sericulture Office leh Sericulture Farm a tlawh.

Pu V.Zothansanga, DSO leh District Sericulture Office staff te’n Sericulture Secretary hi lo dawngsawngin inkawmhona hunt ha tak an hmang a, DSO leh a thawhpuite chu taima tak leh thahnemngai taka thawk tura fuihin Pi C.Zothankhumi chuan Central Silk Board pawhin Mizoram chu Silk pangang khawina atana hmun tha tak ani tih an rawn hriat tawh avangin kan lakah beisei pawh an nei sang a ni a ti a, pangang khawi hi mi taima leh teirei peih te thawh chi anih avangin vawilehkhata a hlawkna tel nghal thut theih ani lova, a hlawkna tel turin hun duh rei deuh mahse a hlawkna tel tur a tam em em thung a ni a ti a, hetiang dinhmun hi anih avangin pangang khawitu te pawh fuih tam an ngai a, phur taka an thawh theihnan vil peih an ngai ani a ti bawk. Cocoon quality tha neih a pawimawhzia sawi uar turin thawktute hi a chah a; Aizawl Zemabawka Cocoon Reeling Factory pawh tih len a tul thu leh hemi atana tan an lak mek thu a sawi bawk.

DSO leh a thawhpuite pawhin an Department enkawltu lu berin an office a tlawh chu an lawmthu an sawi a, hetih rual hian tangkai lehzuala hna an thawh theih na tura an mamawh thenkhat Secretary hnenah hian thlenin chung zingah chuan Eri Seed farm Serchhip a siam chungchang te, Muga Farm Thenzawla dah chungchangte bakah, Farmers’ Training Hall siam te, Office Approach Road siam that te, Staff Quarters indaihlohna phuhruk dan tur te leh Serchhip Khawpui laili a District Sericulture Office neih dan tur chungchangte a tel a, Secretary chuan a lo zirchian dawn thu leh bawhzui ngai te a theih anga chaka bawhzui sak a tum thu a hrilh a ni.

Tun dunhmunah hian District Sericulture Office Serchhip ah hian thawktu 15 (DSO-1, Extension Officer-2, Head Assistant-1, LDC-1, Demonstrator-4, IV Grade-3 leh M/R-3) an awm a, Serchhipah leh Thenzawlah Mulberry Farm an nei a, Government Sericulture Farm, Serchhipah tunah hian Silkworm rearing neih mek niin, 50 dfls (Nistari) vulh a ni a, 3rd Moult (inlip vawithumna) stage ah an awm mek a ni. Government Sericulture Farm, Thenzawl ah pawh 70 dfls (Mc4) vulh niin, 3rd Moult Stage ah an awm mek bawk.

Government Sericulture Farm, Serchhipah hian Central Silk Board (CSB) nen tangkawpin Institute of Village Link Programme hnuaiah 3000 dfls Chawki rearing neih a ni a, kar kalta khan Chawki worm sem chhuah niin Silk Farmer ten an vulh mek a ni. Serchhip a Cocoon Purchasing Centre atangin kumin chhung hian Reeling Cocoon kg. 340.5 Private Silk Farmer te hnen atangin lei ani tawh a, heng Cocoon te hi Serchhip sh ur ro vek niin Zemabawka Cocoon Reeling Factory ah an thawn thin a ni. Hei bakah hian District sericulture Office, Serchhip hian NLUP hnuaia pangang khawi thlang (beneficiaries) 207 an enkawl mek bawk.

Source: DIPR, Serchhip