DAN LOVA SUM KHAWN CHUNGCHANG SERCHHIP BAWRHSAP HOVIN SAWIHO


Serchhip the 22nd July, 2013: Vawiin chawhnu dar 3 khan Serchhip Bawrhsap Pi Juhi Mukherjee, IAS, hovin a Office Chamber ah Serchhip –a Tlawmngai Pawl leh NGO hrang hrang aiawhte “Pawl hminga dan lova sum khawn (donation) chungchang” sawihovin an thukhawm.

Bawrhsap chuan tunlaia NGO thenkhatin pawl hminga dan lova tihluihna a tanpuina sum khawn thin chu dan bawhchhiatna lian tak anih thu sawiin; tumahin mahni thu a dan leh thupek kengkawh lo turin leh sawrkar official te nena thawhho dan thiam turin NGO leh Tlawmngai Pawlte chu a ngen a, a bik takin ILP neilo leh dan lova hnamdang sumdawngte hnenah mimal tute emaw in Pawl hminga sum an khawn thin hian Pawl a tihhmingchhiat bakah dan bawhchhiatna nasa tak a ni a, hetianga Pawl hminga thil diklo tih thin hi Serchhipa a thlen ve lohna turin Tlawmngai Pawl/NGO hrang hrangte chu an member te fimkhur tur leh dan bawhchhe lo tura in chah uluk thar leh turin a ngen a, Tlawmngai Pawl leh NGO hruaitute pawhin Bawrhsap ngenna chu an ngaihpawimawh thu sawiin, hetiang thil hi ven ngai leh fimkhur ngai tak a ni an ti a, dan dik taka zawm ngei a nih zel theih nan theihtawp chhuah an tum thu an sawi bawk a ni.

ILP leh dan lova sumdawng dapchhuah chungchang hi thenkhatin remchang a la a midangte harsatna siam (harass) sak nan an hman thin avangin hetianga harsatna tawk te chuan DC Office Phone No. 03838-222432 emaw, SDPO Serchhip Office No. 03838-222531 ah te engtiklai pawhin an harsatna te a thlen theih a, Bawrhsap chuan hetiang harsatna complaint a awm chuan, thu tling/thudik anih leh nihloh finfiahpui thin turin tlawmngai pawl leh NGO te chu a sawm nghal bawk a ni.

Vawiin thutkhawmah hian YMA Sub-Hqrs Serchhip, MHIP Sub-Hqrs Serchhip, MUP Sub-Hqrs Serchhip, MZP Hqrs Serchhip aiawhte bakah Sawrkar lam atangin Police leh I&PR Department aiawhte an tel a ni.

Source: DIPR, Serchhip