SERCHHIP A PARKING FEE LAK DAN TUR CHUNGCHANG SAWI HO


Dated Serchhip, the 21st November, 2016: Vawiin hian Serchhip DC Pisa ah Bawrhsap Dr. Lalrozama, IAS kaihhruaiin Serchhip khaw chhung hmun thlan bika parking fee khawn dan tur leh lirthei, kawng dunga zan riah chingte chunga hmalak dan tur an rel.

Dr. Lalrozama, IAS chuan, State Transport Authority in ruahmanna a siam angin Serchhip a hmun thlan bikah Parking Fee lak tan thuai a ni dawn a. Serchhip hi khawpui thang chak leh lirthei pung chak tak a nih avangin lirthei chungchanga inrelbawlna fel leh mumal zawk a awm theih nan hei hi kan mamawh hle a ni. Tunah hian ruahmanna engkim, State Transport Authority pawmpui thlap nei vek tawh mahila, thil thenkhat han tih danglam hlek ngai tlem azawng a awm nia kan hriat avangin ennawn leh hleka, State Transport Authority lam pawh han dawr nawn leh lawk tul kan tih avangin hun rei vaklo chu kan nghah leh hlek a ngai chauh a ni, a ti. Bawrhsap hian, kawng dunga zana lirthei riah chingte, National Highway mahni Garrage ang maia hmang thin te, a bik takin vantlang kawngpui pawimawh laia rei tak tak lirthei chhia dah thinte chungah pawh khapna leh a tul anga in chawitir thlenga hmalakna te pawh a awm thuai tur thu a sawi a. Hei vang hian Serchhipa lirthei neitute chu lirthei dahna mumal tak nei thuai turin a ngen a ni.

He meeting ah hian Police aiawhte, Transport Department leh MVI aiawhte, Traffic Police aiawhte Village Council aiawhte bakah SDO Sadaar Pu Vanrengpuia leh Information Department aiawhte an tel a ni.

Source: DIPR, Serchhip