CAPTIVE FARMING OF PASSION FRUIT PROJECT FOR TUIKUM CLUSTER UNDER NLUP/RKVY HAWN A NI


Serchhip, 21st October, 2014: Mizoram Food and Allied Industries Corporation Ltd. (MIFCO) bultumin vawiin chawhma dar 11:00 khan Chhingchhip Mualpui a “Chhingpuii Run” ah Tuikum cluster a NLUP leh RKVY kaltlanga Sapthei chin runpui “Captive Farming Project of Passion Fruit in Tuikum Clusters under NLUP/RKVY” hawnna inkhawm buatsaih a ni a, Horticulture Minister Pu PC Lalthanliana leh NLUP Implementing Board Chairman Pu JH Rothuama, MLA ten an hmanpui.

He hun hmanpuitu khuallian Pu PC Lalthanliana chuan Mizoram sawrkar hi a hausa lova, a pachhia ani tih hi zep thu a awm lova, mahse pachhe chung chungin Mizoram sawrkar chuan miretheite thleng phak budget a chhawpchhuak reng a, ngaihpawimawh berah a nei tlat a ni tiin sawrkar atanga tanpuina an hmuhte chu awmze nei tak leh hlawkpui ngei tura kalpui turin a chah a, sawrkarin tanpuina sum a pek chu hah tak leh rim taka thlan tla chunga hna an thawhna tur atan leh a hlawhtlinna rah erawh hlim taka an sengna tur a ni a ti a, Sawrkarin min tanpui thinna lam ngaihvena phur hurh ringawt a keimahni thawh ve tur lam ngaihthah leh tlat ching kan la tam ani a ti a, tanpuina sum reng rengin a thil tum tihhlawhtlin na tur chuan a dawngtu leh a petu ten an thawh tur ve ve inkhairual taka an hlen a ngai ani tiin taima turin mipui kalkhawmte a fuih a ni.

Khualzahawm Pu JH Rothuama pawhin Cluster system hmanga kalphung thar hnuaia hmalakna tura ruahmanna a tak takin a thleng dawn ta hi a lawmawm a ni a ti a, mipuite pawh an phur ve ngei arin thu leh a hlawhtlin hun a nghahhlelh tawh thu a sawi a, Captive Plantation hmanga bultan thar ani hian Mizoram tan kawl eng a rawn thlen ngei a beisei tlat thu sawiin NLUP dawngtute zingah tha taka thawka hlawhtlinpui tam tak an awm lain engemawzat thawk tha duhlo, tanpuina sum pawh thildang atana hmang an awm thin hian a rilru a tihnat thu leh a khawngaih thu a sawi a, an vanduai hle a ni a ti bawk.

Pu JH Rothuama chuan tanpuina dawngtu kalkhawmte chu an tu leh fa te tan vawiin hi bul an tansakna ni a ni tih hre tura a duh thu hrilhin an tu leh fa ten an hnathawh zar an zo ngei theihna tura ngaihtuahna fim nen tawngtai chunga theihtawp chhuah turin a fuih a ni.

“Captive Farming Project of Passion Fruit in Tuikum Clusters under NLUP/RKVY” hi MIFCO in a enkawl dawn a, kutin Chhingchhipa MIFCO Processing Plant ami tur sapthei rah metric ton 10,000 tal pe thei tura beisei niin; he Cluster a sapthei chingtute nen MIFCO hian inremna siampuiin an sapthei tharchhuah te a leisak vek dawn a, heng beneficiary te hi Identity card leh Number pek vek an ni bawk.

Tuikum Cluster ah hian Serchhip District-a Khaw 10 (Khumtung, Baktawng Vengpui, Baktawng Tlangnuam, Chawilung, Chhingchhip Mualpui, Chhingchhip, Chhiahtlang, Hualtu, Hmuntha leh Khawbel) bakah Aizawl District atangijn Phulmawi khua, an zavaiin khaw 11 an awm a, beneficiary 612 an awm a ni.

Beneficiary te hi sapthei chinna tur hian hectare 1tal ram an nei tur a ni a; sapthei tiak 2000 theuh pek an ni ang a, heta tang hian kumkhatah sapthei kg 20,000 tal tharchhuak tura beisei a ni.

“Captive Farming Project of Passion Fruit in Tuikum Clusters under NLUP/RKVY” atan hian tangkafai Rs. Nuaih 783.62 ruahman a ni a, NLUP atangin Rs. Nuaih 521.12 leh RKVY atangin Rs. Nuaih 262.50 hman a ni ang.

Beneficiary te hi tanpuina sum 1st installment Rs. 15,000/- theuh an bank account kaltlangin pek an ni a, November thla ah Rs. 35,000/- man hu sapthei zamna tur thirzai sem a ni ang a, tanpuina hi a tahtawlin a tangkafai leh bungrua in sem zel a ni ang.

MIFCO hi NLUP kaltlanga tih nun thar leh mek niin tanpuina pawh Rs. Nuaih 274.80 (Rs. 133 lakh for salary and Rs. 141.80 lakh for other financial grant) pek ani tawh a ni.

Source: DIPR, Serchhip