SERCHHIP-AH BAWRHSAP HOVIN PARTY AIAWH LEH MEDIA TE MEETING


Serchhip the 21st October, 2013: Vawiin chawhma dar 11:00 khan Serchhip District Election Officer leh Bawrhsap ni bawk Pi Juhi Mukherjee IAS hovin ama pisa ah Political party hrang hrang hruaitute leh thuthar lakhawmtu ten kan hma lawka Mizoram inthlanpui lo awm tur atana inbuatsaihna chungchangah inkawm hona hun an hmang.

Vawiin inkawm hona hun kaihruaitu Pi Juhi Mukherjee chuan inthlan kan hmachhawn turah Election Model Code of Conduct chu party tin leh candidate ten zawm ṭheuh turin a ngen a, chu chu inthlanna muanawm, dik leh felfai kan neih theih nana pawimawh leh hmasaber a ni a ti.

Media chi hrang hrang - Cable TV leh chanchinbu mite pawh an thuchhuah ah fimkhur tur leh mimal, party leh inthlanna boruak tichhe thei lakah fimkhur taka thu chhuah ṭhin turin a chah bawk.

Vawiin meetingah hian party leh candidate te sum hman dan chungchangte, party hrang hrang ten an tih tur leh tih loh tur chungchang te sawiho a ni a, Serchhip district chhunga election kaihhnawih bungrua, lirthei leh hmanraw hrang hrang hawh man leh hman man chungchangte sawihovin a rate tur te bithliah nghal a ni bawk a, meeting-ah hian district chhunga party hrang hrangte aiawh leh media lam aiawhte an kal ṭha hle a ni.

Source: DIPR, Serchhip