GOVERNMENT PC RANGKHUMA (PCR) HIGH SCHOOL TEN FAINA HNATLANG AN NEI


Dated Serchhip, the 21st September, 2016: Vawiin hian Govt. PCR High School Serchhip chuan Swachh Bharat hmalakna leh kan hma lawka Faina Hapta lo awm tur denchhenin Khawtetlang Playground leh a chhehvelte thenfai hnatlang an nei.

Headmester Pu Lalduhawma Khiangte chuan, kum tina an School in Faina lam hawi inzirtirna leh hnatlang an neih thin thu sawiin, khawlai dungte, vantlang hmun pawimawh ta an lo tihfai thin tawh thu a sawi a. Kumina Faina hnatlang neih nan hian kar kalta Ni 12 – 16 September, 2016 chhunga Serchhip District High School Sports an neihna hmun Khawtetlang Playground chu an thlang ta a ni. Playground chhung leh a chhehvel te, inkhel entute thutna tur insak chhung zawng zawngte chu uluk takin an thian fai a. An bawlhhlawh lakkhawm phur chhuaka, a tihralna tur hmuna tihral sak turin Serchhip DLAO Pu Lalfakzuala Chhakchhuak chuan Motor a ngaihtuah sak nghe nghe a ni.

Govt. PCR High School hian kum tinin faina beihpui hi an thlak thin a, khawlai dung thenfai hnate an thawk thin a ni. Vawiina hetianga hnatlang an neih bakah hian Faina Hapta chhungin Faina Hnatlang neih leh tumin ruahmanna an siam mek bawk. Kumin hian Government PCR High School hian zirlai naupang 60 bawr vel an nei a ni.

Source: DIPR, Serchhip