AGRICULTUR DEPARTMENT IN NLUP AN SEM


Dated Serchhip, the 21st July, 2016: Vawiin chawhma dar 10:30 khan Agriculture Department Serchhip District chuan Hmar Veng YMA Hall-ah an Department hnuaia trade hrang hrangte thlangtu Serchhip, Bungtlang leh Chhiahtlang khuaa mite hnenah NLUP sum an sem.

He hunah hian Pu James Lalsiamliana, DAO Serchhip chuan thu sawiin, sawrkar hmalakna lawmawm tak NLUP sum sem leh theiha a awm leh ta chu lawmawm a tih thu a sawi a, tanpuina sum dawngtuten an sum dawnte a hmanna tur takah an hmang em tih uluk taka an endik thin thu leh, endik hna an thawhna kawngah tanpuina dawngtuten theihtawpa an lo tanpui thin avanga lawmawm a tih thu a sawi bawk. NLUP in a tum ber mahni kea ding thei tura insiam rem a nih ang ngeiin tanpuina dawngtute chu hma la chhunzawm zel tura beisei tlat an nih thu a chah bawk.

Agriculture Department hnuaiah hian NLUP trade hrang hrang Pali (WRC-I, WRC-II, Oilpalm, Sugarcane) awmin hengah hian 3rd Phase leh 4th Phase ah a thawh khatna sem zawh vek tawh a ni a, vawiinah hian a a thawh hnihna sem chhunzawm niin, pawisa faia sem lovin an bank account-ah thun sak vek an an ni.

Pi Lalsangzuali Hmar, AEO Serchhip chuan Technical report pe in, 3rd Phase bikah 26-Serchhip Cluster huam chhungah mi 62, 27-Tuikum Cluster ah mi 91, 28-Hrangturzo Cluster ah mi 193, an vaiin mi 347 an awm thu leh 4th Phase ah 26-Serchhip Cluster huam chhungah mi 19, 27-Tuikum Cluster ah mi 41 leh 28-Hrangturzo Cluster ah mi 122, an vaiin mi 182 an awm thu sawi.

Vawiina an pek chhuahte hi Serchhip, Bungtlang leh Chhiahtlang khuaa mite hnenah niin khaw dangah pawh sem chhunzawm zel tura ruahman a ni. Vawiina tanpuina sum an semte hi WRC-I tan Rs. 20,000 niin leilet bial siamna leh thlai chin theih nana buatsaihna atana hman tur a ni a, WRC-II in Rs. 20,000 dawngin Terrace laihna atan leh thlai chinna tlak atana buatsaihna tur a ni. Oilpalm chingtute hian Rs. 20,000 dawngin, Oilpalm an phunna khur chhilhna atan te, lei tha leina atan te leh Oilpalm kara thlai phun nan leh a hmun sam faina atana hman tur niin Sugarcane thlangtute hian Rs. 16,000 dawngin Fu phunna leh leitha leh hlo tur leina atan te leh hlo thlawh nan Fu hmun enkawl nante hman tur a ni dawn a ni. NLUP Serchhip District Agriculture Department hnuaiah 3rd Phase leh 4th Phase atan hian a vaiin Rs. 1,04,20,000 sem chhuah a ni dawn a ni.

He hun hi Pu Lalringliana, SDAO Serchhip chuan kaihruaiin, Pu T. Ngurkhuma, AEO Serchhip in lawmthu sawina hun a hmang a ni.

Source: DIPR, Serchhip