BANK HNATHAWH THLIR HONA (DCC/DLRC/DLSC MEETING) NEIH A NI


Dated Serchhip, the 21st June, 2017: Vawiin hian Serchhip District Consultative Committee (DCC)/ District Level Review Committee (DLRC)/ District Level Security Committee (DLSC) chu an Chairman Pi Sangchhin Chinzah, Bawrhsap ni bawk hovin Bawrhsap pisaah an thukhawm a, kum 2016-2017 chhunga Bank te hnathawh an thlirletin hmalak dan turte an duang.

Pi Sangchhin Chinzah chuan, Bank te tel lovin sawrkarin hmasawnna hna a thawk thei lova, mimal sumdawng leh thilsiamchhuahna neite pawhin Bank tel lovin hma an la tak tak thei lo. Mi tam takin Bank nihphung leh hnathawh dan an hrethiam lova, an sum puk te rul tha duhlovin harsatna an siam sak thin a, chu chuan hmalam pan zelna kawng a tibuai thin a ni. Bank te hi hlep neia sum puk chhuah tir thin an nihna hrethiam chunga kan dawr a tul a ni, a ti. Chutihlaiin sawrkarin Bank te chu an hnathawh danah an tlin ngei tur target a siam sak ve bawk a, chung an target te chu bank lam pawhin tlin ngei tumin theih tawp an chhuah ve bawk tur a ni, a ti bawk.

Report atanga a lan danin kum kalta chhunga Deposit zawng zawng hi Rs. 16696.74 a ni a, Loan chi hrang hrang sem chhuah hi Rs. 9456.51 niin Credit Deposit Ratio (CD ratio) hi 56.64% a ni. Hetihlai hian CD Ratio bituk zat chu 60% tal a ni thung. UBI chu CD Ratio sang ber niin 171.01% a ni a, a hniam ber chu SBI niin 42.86 a ni, CD Ratio hian nikum a phak lohna chu 2.13% a ni.

Annual Credit Plan hnuaiah Priority Sector bikah target hi Rs. 2315 Lakhs a nih laiin nikum chhung khan Rs. 3198.88 pek chhuah a ni a, an pekchhuah hi 138.18 % lai a tling. Hetihlai hian Priority Sector peng pathum zinga Industry Sector hnuaia loan pek hi a tlem fal hle a, 65.03 % chauh tlin a ni. Industry Sector a hniam chhan hi Industry activity a tlem vang a nih thu sawi a ni. Agriculture Sector ah target hi Rs. 660 Lakh a ni a, a taka pek chhuah chu Rs. 616.72 Lakh a ni a, Service Sector ah hian Rs. 1000 Lakh target a ni a, a taka pek chhuah chu Rs. 2156.22 Lakh a ni. Priority Sector chhunga Loan pek tawh zawng zawng Rs. 1364.19 Lakh atanga rulhna lut zat hi 75.16% a ni a, he Sector hnuaia loan la, ngaihsak zui miah loh (Non Performing Assete/ NPA) zat hi 8.95% niin a pawisa chuan Rs. 607.27 lakh zet a tling a ni. Basel II Norms ah chuan NPA hi 5% aia a san chuan Risky Level a ni. Crop Loan hi target Rs. 385 Lakh a nih laiin a taka pek chhuah hi Rs. 217.01 chauh a ni a. Meeting chuan, Serchhip District chu chawhmeh tharchhuah theihna hmun tha tak a nih avangin nasa zawka chawhmeh tharchhuak thei tura kuthnathawktute dawmkana, tanpui tam deuh deuh nise, tiin a rel a ni. Tun sawrkar kum thar atang chuan Crop Loan la ten Crop Insurance an tih zel a tul tawh dawn a, hei vang hian Bank lam tan pawh harsatna tam tak sutkian a nih beisei a ni bawk.

Kum kal ta chhung khan PMEGP ah Margin Money Rs. 146.61 District in a neih laiin a taka pekchhuak chu Rs. 58.74 chauh a ni a. Hetianga a tlak hniam chhan hi online submission hman thar a nih vang te, Branch ten anmahnia Sanctioning power an neih tak loh vanga hun a duh rei tak vang te, documents submit kim loh vanga hun a duh rei vang te nia sawi a ni a. Kum kal mekah hi chuan Margin Money hi 100% achieve ngei tum nise tiin a rel a, kumin PMEGP target atan hian Margin Money ah Rs. 153.70 chu an pawm bawk. Tin, Stand Up India Scheme hnuaia hmalakna engmah la awm lo chu thalo an tih thu sawiin tun kum kal mekah chuan hmalakna awm ngei se tiin an rel bawk.

Hengte bakah hian kum kal meka DAY-NRLM target an buatsaih loan thar atan Rs. 332 Lakhs, renewal ah Rs 27.50 Lakh te, DAY NULM atana target atan Rs. 103 lakh te, PMAY (Urban) atana target duan te, leh Annual Credit Plan atana target Rs. 4450 Lakh te chu an pawm bawk a ni.

Hengte bakah hian Bank hlatna khuaa Business Correspondent dah belh dan tur te, Chhingchhip Sainik School thara Bank Extension Counter dah thar dan tur te, Finacial Literacy Camp hmachhawp neih dan te leh hmalakna tur dang pawimawhte sawi a ni a. Bank te himna lama hmalak dan turte pawh SP Pu Lalringdika’n thil tul nia a hriatte leh hmalak dan turte a sawifiah a ni.

Serchhip District chhungah hian SBI Branch pahnih, Mizoram Co-Operative apex Bank Branch pakhat, UBI Branch pakhat leh Mizoram Rural Bank Branch sawm an awm a. Vawiina DCC Meeting ah hian heng Branch hrang hrangte aiawh bakah Lead bank Chief Manager Pu R. Ralkhuma leh NABARD aiawh te leh District Officer pawimawh engemawzat an tel a ni.

Source: DIPR, Serchhip