CHHINGCHHIP-AH FREE ANIMAL HEALTH CAMP BUATSAIH


Serchhip, 21st May, 2015: Vawiin khan AH&Vety Department, Serchhip District buatsaihin Chhingchhip Community Hall-ah Awareness Campaign – cum - Animal Health Camp buatsaih a ni a, he hun hi Tuikum Assembly Constituency bialtu MLA Er. Lalrinawma’n a bial chhunga MLA Model Village atana Chhingchhip khua a thlan denchhena AH&Vety. Department hmalakna a ni.

Awareness Campaign – cum - Animal Health Camp hi hun hnih ah then niin chawhma lamah ran enkawl dan chungchang inzirtirna hun (awareness campaign) hman niin he hun kaihruaitu Dr. Lalnghinglova, DVO, Serchhip District chuan Chhingchhip khua chu MLA model village a puan anih tak avangin khawdangte entawntlak ni tura tunhma aia nasa lehzuala kawng tinrengah tan an lak a ngaih thu ranvulhtu kalkhawmte a hrilh a, ran chaw pek uluk chungchangte, an hriselna vil uluk a ngaih thu te leh ran daktawr te rawn taima tura chahin mithiamte thurawn ngaithla a zawm thin turin a hrilh bawk a ni.

Awareness campaign ah hian Dr. R.Lalmakthanga, FDO, Serchhip hnen atangin ran in sakna hmun thlan dan tur leh sak dan tur dik bakah Ui seh enkawl dan tur zirtirna dawn a ni a, Dr. Biaklianzuali, V.O., Chhingchhip in Vawk vulh leh enkawl dan zirtirna a pe a, Dr. Lalsanglien Ralsun, V.O., Serchhip hnen atangin Bawng vulh dan tur dik zirtirna ngaihthlak anih bawk.

Chawhnu lamah a thlawna ran entirna hun buatsaih niin ran damdawi leh ran enkawl dan zirtirna bu a thlawnin sem a ni a, Bawng, Vawk, Ui leh Ar entir an tam ber a ni.

Source: DIPR, Serchhip