PU HMINGDAILOVA KHIANGTE IN HOCKEY TOURNAMENT HAWNG


Dated Serchhip, the 21st March, 2017: Vawiin hian Parliamentary Secretary for Sports, etc., Pu Hmingdailova Khiangte, Hockey Mizoram President ni bawk chuan Baktawng khaw Playground ah Pu Chawngkhuma Memorial Hockey Tournament, 2017 a hawng.

A hawnna inkhawmah Pu Hmingdailova Khiangte chuan, Mizoramah Hockey ngainatute an tlem tial tial laia Baktawng khuain kum tam tak chhung Hockey an lo chawi nung tlat chu lawmthu a sawi a, Hockey a nun zel theih nana sum leh pai tam tak senga Memorial Tournament buatsaihtu Pu Chawngkhuma nupui fanaute chungah lawmthu a sawi bawk. Baktawng khawtlang mipuite chu an Hockey ngainatna leh an thiamna te mahni khaw chhungah duhtawk mai lova ram zau zawk dai dar zawnga hma la tura ngen bawk. Hockey lama Mizo thalaite thlen chin tarlangin hmeichhe lamah National Senior Player pahnih leh Under 18 National Player pakhat bakah Age-Group ah tho mipa pakhat kan neih mek thu a sawi a. Hockey lama Mizoram sawrkar hmalakna tarlangin Kawnpuiah Mipa tan Hockey Academy leh Thenzawlah Hmeichhe tan Academy a awm thu a sawi a, Aizawlah pawh Astro Turf phahna tur zawn mek a nih thu a sawi bawk. Pu Hmingdailova Khiangte hian Kawnpuia Boys Hockey Academy ah Baktawng thalai, lehkha zir chunga Hockey zir tur mi pahnih a thun sak tur thu a puan bakah Baktawng Games and Sport Association hnenah Hockey Stick Dozen hnih leh a Ball Box khat a hlan nghal a ni.

He Tournament hawnna inkhawm, Pu Fx Lalthianghlima, President, Baktawng GSA kaihhruaiah hian Pu R. Zalawma, Baktawng VCP pawhin thusawina hun a hmanga. Baktawngah hian kum 1937 vel atanga Hockey an lo khelh thin tawh thu leh kum 1948 atanga mumal taka Tournament an lo buatsaih tawh thin thu a sawi a. 1948 chhova an lawmman inchuh chu Meihawl hmang Istiri a nih thu a tarlang nghe nghe a ni. He Tournament hi “Inkhelhpui” tia Baktawng khawtlang chuan an sawi mai thin thute, rambuai lai pawha chatlak lova an kalpui thute a sawi bakah mi hrang hrangten bul an lo tum sak tawh thin (sponsored) avanga a lawmthute a sawi a ni. Tin he hunah hian Tournament bul tum sak mektu Pu Chawngkhuma fapa Pu Ch. Lalngaihawma pawhin thusawina hun a hmang bawk a ni.

Pu Chawngkhuma Memorial Hockey Tournament ah hian inelna then hrang hrang (under 16 atanga Veteran category)a inel turin Team 39 an lut a, hemi ruala buatsaih tho Chawngtluangzela Memorial under 14 Football Tournament ah Team 8 an lut bawk a ni.

Pu Hmingdailova Khiangte hi Pu Rosangliana, Administrative Officer, Mizoram State Sport Council chuan a tawiawm a ni.

Source: DIPR, Serchhip