CO-OPERATION MINISTER LALRINMAWIA RALTE -IN SERCHHIP AH MIZOFED LPG SHOWROOM BUILDING THAR HAWNG


Serchhip, 21st February 2014: Co-Operation Minister Pu Lalrinmawia Ralte chuan vawiin chawhma dar 11:00 khan Rs. Nuai 16 chuang senga sak New Serchhip-a MIZOFED LPGShowroom thar a hawng.

Showroom hawnna inkhawm ah Minister Pu Lalrinmawia Ralte chuan MIZOFED chu Serchhip mipui ten tangkai taka an hman ngei a beisei thu a sawi a, MIZOFED a thawktu te pawh anmahni dawrtu mipuite ngaipawimawh thin turin a chah nghal bawk a ni. Mipui rawngbawl sak tu tur hian kan rawngbawl sak tur te hi kan hlamchhiah zawk thin chang a tam tih sawiin Minister chuan eng hna pawh thawk ila, eng dinhmunah pawh ding ila, midang ten kan hnenah mamawh leh harsatna thlen tura min rawn pan duh chhung hi chuan lawm nachang kan hriat a tul a, Taxi fare emaw, Bus fare emaw, sum leh pai bakah tha senga min dawr tura kan office rawn pan vang vang duh tu an la awm chhung hi chuan lawmthu sawi mawlh mawlh zawk tur kan ni tih hriat thar a pawimawh thu a sawi a ni.

Mizoramah hian ‘Dan’ kan in ti hre leh lutuk thin hi a that rualin harsatna tam tak siam tu ani ve thin tih sawiin Pu Rinmawia chuanDan chu mipuite sahimna leh thlamuantu, harsatna siam sak lo tur a duan anih rualin mipui nawlpui harsatna siam thei tur zawnga lek a ngaih chang hi chuan thuneitu lam pawhin ngaihtuahna sen uluk a tha thin a a hriat thu a sawi a, mipui thatna tur atana Dan siam sa te hi bawhchhe kher lova, her rem hret zawka kalpui a tul chang hriatthiam a pawimawh thin a ni a ti bawk. Midang ngaihpawimawh thiamnate, huho nun thiamna te hian mihringte dinhmun sangah a dah thin a ni a ti bawk.

Vawiina hawn tak MIZOFED Showroom thar hi New Serchhip YMA Hall bulah awmin building hmalam hi feet 38, a hnung lam feet 20 a ni a; MIZOFED Serchhip Branch Office atana hman nghal tur a ni ang. National Cooperative Development Corporation (NCDC) kaltlangin Showroom sakna turin pawisa Rs. 13,96,300/- hmuh a ni a, pawisa hmuh hian a daih loh avangin MIZOFED in Rs. 2,13,064/- a thawh belh a, Showroom sak zawh nan hian Rs. 16,09,364/- sen ral a ni. Tun dinhmunah MIZOFED Serchhip Branch hnuaiah consumer 8202 an awm mek a, kum 2012-13 ah khan Rs. 2,41,48,000/- hmuchhuakin Rs. 16,11,000/- an hlep a ni. Tun hnai kum thum kal ta chhunga MIZOFED Serchhip Branch atanga Gas Cylinder semchhuah zat a hnuaia Table-ah hian tarlan a ni.
 

KUM GAS BUR SEMCHHUAH ZAT
 2010-2011 55,692
2011-2012 58,792
2012-2013 53,557
2013-2014 (Feb 21, 2014 thleng) 37,910

TOTAL

2,05,951

MIZOFED Serchhip Branch hi April ni 10, 1991 ah din tan a ni a, February ni 7, 2007 ah New Serchhip ah ram 180.2 Sq.M a zau pek an ni a, mahse harsatna neuh neuh vangin January ni 5, 2013 ah ram chungchang hi chinfel a ni a, ram chungchang chinfel anih veleh Showroom sak hna hi tan nghal anih thu Pu Vanlalsawma, Managing Director, MIZOFED Ltd. chuan a sawi a ni.

Vawiin MIZOFED Showroom thar hawn inkhawm hi Pu K.Laldawngliana, Chairman, MIZOFED Ltd. In a kaihruai a, Pu Vanlalsawma, Managing Director, MIZOFED in Report a pe a, Pu Lalpekliana, Registrar, Co-Operative Societies, Mizoram in thusawiin Pu H. Thangrenga, Vice-Chairman, MIZOFED Ltd. In lawmthu sawina hun hmangin a khar a ni.

Source: DIPR, Serchhip