SERCHHIPAH DISTRICT LEVEL VIGILANCE AND MONITORING COMMITTEE THUKHAWM


Serchhip, 21st January, 2015: Vawiin chawhma dar 11:00 khan Serchhip DC’s Meeting Room ah Serchhip District Level Vigilance and Monitoring Committee neih a ni a, Committee Chairman Pu C.L.Ruala, Lok Sabha M.P., Co- Chairman Pu Ronald Sapa Tlau, Rajya Sabha M.P., Er. Lalrinawma MLA (Tuikum Constituency) ten he hun hi an hmanpui a, Committee Chairman in a sawmna angin Co-Chairman Pu Ronald Sapa Tlau chuan he meeting hi kaihruaiin, Sawrkar Laipuiin District chhung hmasawnna hna a ruahman chi hrang hrangte kalpuitu Implementing Department ten an thawh dan an thlirho a ni.

Meeting kaihruaitu Pu Ronald Sapa chuan member te chu hmasawnna hna thawh chungchangah Serchhip District tana hma latu bulpui ber, a hnuk an nih thu hrilhin hmasawnna tak tak duhna thinlung pu a hna thawk tur leh Statistic leh Data te pawh dik tak leh innghahna tlaka siam thin turin a chah a, Mizorama Grape thar te a thur tlat thin zirchianga Grape thlum kan thar chhuah theih dan tur min ngaihtuah sak leh Pa (mushroom) chi rin tlak kan chin theih nan Taiwan Sawrkar a dawr thu leh mithiam an rawn tirh thuai dawn thu a sawi bawk.

Lok Sabha MP Pu C.L.Ruala pawhin Mizoram sangha tharchhuah chungchang sawiin phai dilah Sangha tha tak tak Mizoram pawn ami ang quality an tharchhuah theih lai a, a Zo deuh a sangha dil awmte tharchhuah a tlem bakah a quality a hniam deuh bik thin chu zirchian tula a hriat thu a sawi a, IWMP hnuaia Project te chu an hmalakna huamchhung (area) a zau hlawm thin em avangin vil hneh a har thin a, hlawhtlinna hmuh loh a tham ral mai mai a awm loh nan Project awm sa te a hlawhtlin hma chu nasa taka insawrbing thin turin PIA te a chah a ni.

Kum 2001 leh 2011 inkara Mizoram chhunga Child Sex Ratio chhinchhiahna ah Mizoram pumpui a nausen hmeichhe piang zat chu nausen mipa1000 zela 6 (2001 ah 964, 2011 ah 970) a a pun laiin Serchhip District bikah erawh 25 (2001 ah 974, 2011 ah 949) in a tlahniam thung a, hei hi Lok Sabha leh Rajya Sabha MP te chuan an vei thu uar taka sawiin chhuichian vat a ngai a ni an ti a, Health Department hotute pawhin a chhan zirchiang a hma an lak vat an beisei thu an sawilang bawk.

Meetingah hian DRDA kaltlanga hnathawh zing ami MGNREGS hnuaiah kum 2014-2015 kum kal mekah hian Serchhip District ah ni 15 chhung inhlawhna siam anih tawh thu report a ni a, Hna 591 (Serchhip R.D. Block – 413, E.Lungdar R.D Block – 178) thawh niin heng zinga 560 (Serchhip R.D. Block – 392, E.Lungdar R.D Block – 168) hi thawh zawh tawh a ni a, thawh lai mek 31 (Serchhip R.D. Block – 21, E.Lungdar R.D Block – 10)a awm bawk. Kum 2014-2015 chhung atan Serchhip R.D. Block huam chhungah tun thlengin Job Card 11305 pek chhuah a ni a, E.Lungdar R.D. Block huam chhungah Job Card 3442 pek chhuah a ni bawk. Sawrkar Laipui in MGNREGS hnuaia hna siam zinga 60% tal Agriculture leh a kaihhnawih thila hman tur a tih chu tihhlawhtlin a ni bawk.

IAY hnuaiah kum 2014-2015 chhungin Serchhip District ah In 57 sak phalsak a ni a, Sawrkar Laipui atang In 26 sak na tur pawisa hmuh a ni tawh a, Serchhip R.D. Block ah In 17 leh E.Lungdar R.D Block ah In 9 sak ani dawn a, a dawngtu tur pawh thlanfel vek tawh an ni.

Integrated Watershed Management Programme (IWMP) hnuaiah Project panga awmin heng atan hian Annual Action Plan siam mek anih thu Project Implementing Agency (PIA) ten an sawi.

National Social Assistance Programme hnuaiah Tar Pension (IGNOAPS) dawngtu mi 1554 (Serchhip R.D. Block – 898, E.Lungdar R.D Block – 656) an awm mek a, Pension hi Bank kaltlanga pek vek an ni.

Hmeithai Pension (IGNWPS) dawngtu mi 141 (Serchhip R.D. Block – 72, E.Lungdar R.D Block – 69) an awm mek bawk a, Rualbanlo tanpuina (IGNDPS) dawng mi 39 (Serchhip R.D. Block – 20, E.Lungdar R.D Block –19) an awm mek bawk.

National Rural Drinking Water Programme (NRDWP) hnuaiah PHE, Serchhip Watsan Division in Chhingchhip, Baktawng, Seling, North Mualcheng, Buangpui, Tlangmawi leh Sailulak khua te tan tuilakna an siam zawh sak thu an tarlang a, Swachh Bharat Mission hnuaiah khawfai lawmman dawng turin Khaw pali tan dilna an siam sak thu tarlan a ni bawk.

E.E., PWD, Serchhip Division huamchhungah PMGSY Road 5 (Serchhip R.D. Block – 4, E.Lungdar R.D Block – 1) siam thawh mek a ni achungte chu Serchhip Block ah: Chhingchhip – Hmuntha Road (24.400 Km), Chhingchhip – Thentlang Road (12.800 Km), Hmuntha – Khawbel Road (19.950 Km), Chhingchhip – Hualtu Road (20.250 Km) a ni a, E.Lungdar Block ah : E.Lungdar – Sailulak Road (18.580 Km) te an ni a, heng kawng te hi January ni 18, 2014 atanga thawh tan niin thla 24 chhunga thawh zawh tur a ni a, PWD te enkawlna hnuaiah Contractor ten theihtawp chhuahin hna an thawk mek a ni.

E.E., PWD, Khawzawl Division huamchhunga PMGSY road siam mek 4 (Lungpho – Thinglian, Chhawrtui – Vanchengpui, Rullam – Lungpho, Lungpho – Hmunzawl) zingah Lungpho – Thinglian chu formation cutting zawhfel tawh a ni a, a dang pawh khi chak taka hna thawh mek anih thu tarlan a ni.

Source: DIPR, Serchhip