SAGY PROGRAMME HNUAIAH AH&VETY IN CHHIAHTLANG MP MODEL VILLAGE AH VAWKTE SEM


Serchhip, 20th August, 2015 : AH&Vety Department, Serchhip District chuan an bial chhunga Rajya Sabha MP Pu Ronald Sapa Tlau-in Model Village a siam tura a thlan Chhiahtlang khaw hmasawnna tura ruahmanna siam “Village Development Plan” tihhlawhtlinna kawng khat atan RKVY Scheme kaltlangin vawiin chawhnu dar 2:00 khan Chhiahtlang BNRGSK Hall-ah Vawk note an sem a, hemi rual hian vawk vulhtute tan training an buatsaih nghal a ni.

He hunah hian beneficiary chhungkaw 6 hnenah vawk note 6 vulh pun tur pek an ni a, beneficiary te hi intiamkamna thu ziah tir vek an ni bawk. Vawkte te hi remchang hmasa berah AH&Vety Department in a vulhna hmunah kalchilh in vaccine an pe ang a, vawiin hian an damdawi mamawh rulhlut hlo, vitamins etc. a thlawna pek nghal an ni bawk.

Vawiin vawkte sem programme ah hian chhungkaw 21 hnenah vawk chaw man tlawma lei theihna tur “Pig Ration Card” hlan an ni a, he Pig Ration Card hi Vawkpui/Vawkpa chithlahtu a engemaw zawk zawk pahnih chin tal (vawkpa leh vawkpui pakhat ve ve vulh pawh telin) vulhtu te hnenah pek theih a ni a, he ration card neitu hian Sawrkar Approved retailer hnenah vawkpui/vawkpa pakhat tan thla tin vawk chaw kg 90 zel a chhutin a vawkpui/vawkpa vulh te tan a man tlawmin a la thei dawn a ni.

Pi Rohnuni Colney, Charge Officer SAGY Chhiahtlang MP Model Village chuan vawiin hun hi hmanpuiin, Model Village ni tura faina leh hriselna lamah tan nasa taka la turin kalkhawmte chu a fuih a, vawk vulhtu zawng zawngten an vawk in leh a chhehvelte fai leh thianghlim taka vawng thin tura chahin, AH&Vety Department Serchhip ten RKVY hnuaia vawk note an sem dawngtute chu lawmpuina thu leh duhsakna a hlan bawk a ni.

Vawiina Vawkte sem inkhawm kaihruaitu Dr. R. Lalmakthanga, FDO, Serchhip chuan a kaihruai a, Dr. Lalsanglien Ralsun, VO, Serchhip hnen atangin vawk vulh dan leh enkawl dan inzirtirna ngaihthlak a ni bawk.

Source: DIPR, Serchhip