SERCHHIP-AH IPP LEH SRI BUH CHINGTUTE TANPUINA SEM


Serchhip, 20th May, 2015: Vawiin chawhma dar 11:00 khan Hmar Veng YMA Hall, Serchhip ah Serchhip Agriculture Department-in kum 2013-2014 chhunga Department kaltlanga buh chin dan thar - Improved Package Practice (IPP) leh System of Rice Intensification (SRI) hmanga buh chingtute hnenah tanpuina sum an sem a, hetih rual hian MTU & CAU-R1 (buh chi tha), vaimim chi tha (project vaimim chi) leh ‘hlo tur’ an sem nghal bawk.

Serchhip District Agriculture Department hnuaiah hian hetiang buh chindan thar leh hlawk zawka chinna hi ram 9100 hectare a awm a, kum 2013-2014 khan Serchhip a chhungkua 199 ten IPP leh SRI hmangin kum dang aia hlawk zawk leh thahnem zawk an lo thar chhuak tawh a, tlangram lo a buh chin dan phung pangngai aiin a hlawk zawk hle tih an sawi a ni. Buh chindan thar anga ching duhte tan hian buh chi hi pisa kai hun chhungin Agriculture Department hian Serchhip Agriculture Complex a an kudam (godown) atang an pechhuak thei reng a, Agriculture Department chuan buh chin dan thar (IPP leh SRI) mipuiten hmang a buh tui zawk, hrisel zawk leh hlawk zawk thar tura theihtawp chhuah zel turin an duh a, buh chingtu ten buh an chinna kawngah harsatna an tawk anih pawhin tanpui turin an inpeih reng thu leh Insecticide leh Pesticide te pawh an mamawh anga Serchhip Agriculture Office a lam thin turin an chah bawk a ni.

Tanpuina hi chhungkaw 199 hnenah sem a ni a, sum sem zat hi an lo zau zawng azirin ruahman a ni a, a vaiin Rs. 6,00,000/- vel an sem ral a ni.

Source: DIPR, Serchhip