HOSPITAL FAI LAWMMAN 2 NA LAWM


Dated Serchhip, the 20th January, 2017: Vawiin chawhnu dar 2:00 p.m hian Serchhip District Hospital chuan kum 2016 chhunga Mizorama Hospital Fai Intihsiakna KAYAKALP-2016 hnuaia lawmman 2 na an dawn lawmna hun Hospital Conference Hall ah an hmang a, Bawrhsap Dr. Lalrozama, IAS chu khuallian a ni.

A lawmna inkhawm Dr ZD Lalmuanawma, Medical Superintendent kaihhruaiah hian Dr. Lalrozama, IAS chuan Serchhip District Hospital, Building upa leh hlui ve tawh tak maiin fai lawmman pahnihna a dawng thei chu chhuanawm a tih thu sawiin thawktute an fakawm hle a a hriat thu a sawi a. Dam lo leh an awmpuitu leh kantu tam takten tukchhuaka an tlawh ve reng laia Hospital vawnfai chu thil awlsam tak a nih a rin loh thu leh chuti chung pawha Serchhip District Hospital a fai em em reng thei chu District tan a chhuanawm a ni, a tia, thawktute thawh hona tha tak vangin lawmthu a sawi a ni. Mizote hi zirtir nuam tak leh kaihhruai nuam tak kan nih avangin faina leh thianghlimna kawngah hei hian a tha zawnga min zirtir a rin thu leh, District chhung mipuite kan tanrual zel a pawimawh thu a sawi a ni.

He hunah hian Dr. Lalnunhlima Khiangte, Medical Officer chuan KAYAKALP-2016 kalphung sawifiahna hun a nei a, Dr. Laldawngliana Sailo, Chief Medical Officer, Serchhip District in District chhunga hmalakna hrang hrang sawina hun a hmang a, KAYAKALP hnuaia Hospital endik dan chi rukte sawifiahna a hmang bawk. Hei bakah hian kalkhawmte atang leh Hospital thawktute zinga tanga thusawi duh neite tan thusawina hun buatsaih a ni bawk.

A lawmna inkhawm hman zawh hian ruai tuihnai tak an kil ho nghal a ni.

Source: DIPR, Serchhip