'WORLD DAY FOR PREVENTION OF CHILD ABUSE" CHUNGCHANG SAWIHONA HUN HMAN A NI

Serchhip, 19th November, 2015 :Vawiin chawhma dar 11:00 khan I&PR Conference Hall, Serchhipah District Child Protection Unit, Social Welfare Department buatsaihin 'World Day for Prevention of Child Abuse" chungchang sawihona hun hman a ni.

He hunah hian Child Welfare Committee (CWC), Juvenile Justice Board (JJB) leh Special Juvenile Police Unit (SJPU) atangin memberte leh Serchhip khaw chhunga thuthar thehdarhtuten naupangte venhimna chungchang an sawi a. DCPU, CWC, JJB leh SJPU te hnathawh dan inhrilhhriatna te neih niin, Naupangte venhimna kawnga thawhho theih danturte, khawtlangin hma an lak theih dan tur chungchangte leh Media lam pawhin hma an lak theih dan turte sawiho a ni bawk.

Serchhip District-ah hian kum 2012 atanga kumin April thla thleng khan CWC-in Case 217 neiin, hemi hun chhung vek hian JJB hian Case 75 an nei a ni.

DCPU hian Serchhip District chhungah naupang harsa zual sponsorship pek zirlai 83 (Mipa – 46 leh Hmeichhia – 37) an nei a, District chhunga Observation Home atan in luah tur zawn mek a ni bawk a ni.

Vawiina he hun hmannah hian JJB Principal Magistrate Pi Lalrochami Ralte, CWC Chairman Pu RL Chhuanawma leh SJPU atangin Pu Lalchhuanawma Chhangte, SDPO ten an tel pui a ni.
 

Picture: Discussing issues related to Prevention of Child Abuse

 

Source: DIPR, Serchhip