LIRTHEI KHALH CHUNGCHANGA INZIRTIRNA HUN SERCHHIPAH HMAN A NI

Serchhip, 19th November, 2015 :Vawiin chawhma dar 10:30 khan Serchhipa passenger phur thin lirthei khalhtute tana buatsaih lirthei khalh chungchanga dan leh hrai inhrilhhriatna hun ‘Sensitization Programme on Traffic Rules and Regulation’ chu New Serchhip YMA Hall-ah hman a ni.

He hun hi Pu Lalringdika, MPS, Superintendent of Police Serchhip chuan khuallian niin a hmanpui a, thu sawiin vawiina he hun hman hi passenger phur thinte chauh nilovin, lirthei khaltute zawng zawng tana pawimawh tak a ni a ti a, lirthei khaltute chu hun vawn dik kawngah tan la turin a fuih a, lirthei khal hi eizawnna chi khat a ni a, hna zahawm tak a ni a ti. Ram dang mi leh mikhualte laka Serchhip mai bakah Mizote hmel ti langtu pawimawh tak an nih avangin rinawm turin kalkhawmte chu a chah a, Lirthei khalha eizawngtu nih avanga bala tak awm tur a ni lova, mahni phak ang tawka mawi, fai leh zahawma taka inchei thin turin a chah bawk a ni.

Tun hnaia Auto-rickshaw kawngkhar dinglam hawn theih loh tura thupek tihchhuah tawh chu Auto-rickshaw khaltu lam ten sawisel mahse hei hi mipuite him nana thil tul tak anih avangin kaltlangpui zel turin sawrkarin thuchhuah a siam a, lungawi taka zawm turin Auto-rickshaw khaltute a chah a ni.

Sawrkarin dan a siam thin hi sawrkar leh mimal hlawkna tur nilovin mipui nawlpuite himna tur a ngaituah vang a ni a ti a, a zawmtu ni zel turin lirthei khaltute a ngen a, lirthei a lo pung zel a, kan kawng erawh a thang ve si lova, mipui nawlpuiin harsatna an tawh loh nan leh an him zawk nan lirthei tlan dan tur leh hun dan turte pawh tihdanglam a ngai fo thin, kalphung thar siam a awm pawhin zawma, ti hlawhtlingtu ni zel turin kalkhawmte a chah bawk a ni.

Driver nih hian motor khal kal ringawt nilovin a enkawl faite, passengerte tana mi tangkai nihte hi a huam tel vek a, hawihhawm chhuah nachang hriat a tul hle a ni a ti a, zu rui chunga lirthei khalh lo turin leh chung mite lakah chuan thuneituten khauh taka dan an lek kawh tur thu sawiin fimkhur taka lirthei khalh thin turin kalkhawmte a chah bawk a ni.

Pu Sanghnuna Pachuau, District Transport Officer, Serchhip pawhin thu sawiin Lirthei neiha, a khalh phalna neih avang ngawtin kan duh danin lirthei kan khalh tur a ni lova, danin min phut angin lirthei kan khalh thin tur a ni a ti a, lirthei khaltute fimkhur loh avanga chetsualna hi a tam ber avangin lirthei khaltute chu fimkhur tur leh rui chunga lirthei khalh lo turin a chah a, lirthei khalhtuten an tih tur leh tih loh turte a zirtir bawk a ni.

He hun hi Pu MS Dawngkima, MPS, Addl. SP Serchhip chuan a kaihruai a, inkoh khawm harsa leh buaithlak tak ni mahse pasenger phur thinte hian mawhphurhna sang tak an nei a, mihring nunna hlu tak hi an mawhphurhna ah thui tak innghat anih thin avangin hetiang hun hi hman a tul a ni a ti a, ho lam taka ngai lova, rilru leh ngaihtuahna zawng zawng seng turin kalkhawmte a ngen a ni.

Vawiina inkohkhawmah hian Auto-rickshaw khalhtute, Taxi khalhtute, Maxi Cab khalhtute leh Town Bus khaltute leh neitute an kal tha hle a, chawhnu lamah Pu Lalchhuanawma Chhangte, MPS, SDPO Serchhip chuan MV Act, 1988 chungchang a zirtira, Pu B. Lalchuangkima, MVI in Registration/Licencing chungchang zirtirin Pu T. Vanlalhnaia, SI, i/c Traffic Branch chuan lirthei tlan dan leh dah dan chungchangah zirtirna a pe bawk a ni.
 

Picture: Lalringdika (MPS), Superintendent of Police Serchhip

 

Source: DIPR, Serchhip