SERCHHIP DISTRICT ACCREDITED JOURNALISTS THAR TE HNENAH PRESS ACCREDITATION CARD HLAN


Dated Serchhip, the 19th October, 2016: Vawiin chawhnu dar 1:00 khan Pu K. Saitluanga, MIS, District Information & Public Relations Officer, Serchhip chuan a Pisaah Mizoram sawrkarin Accreditted Journalist atana a thlan thar mi 11 te hnenah Press Accreditation Card a hlan.

Accreditation Card inhlanna inkhawm tawiah hian Pu K. Saitluanga, MIS, DIPRO chuan chanchinbu mite chu an mawhphurhna hrechiang tura chahin mipuite zirtirtu leh hruaitu an nihna hre thar turin a chah a. Chanchinbuah Editorial ngai pawimawh tur leh chu chu chanchinbu hmel lanna pawimawh tak a nih thu a sawi a, chanchinbu miten hawi lam bik leh tan lam bik ti lang lova, inbuk tawk taka an kal thiam a tul hle a ni, a ti. Tin, chanchinbute pawh a chhuah hun bi dik taka ti chhuak hram hram zel tura tan la turin a ngen bawk.

He hunah hian Pu C. Lalhminghlua, President, Mizoram Journalist Association, Serchhip District chuan thu sawiin chanchinbu mite chu intuaithar reng turin a chah a, an zahawmna vawng him zel tur leh an chanchinbu enkawlna kawngah tan la zel turin a chah. Mizoram sawrkarin Accreditted Journalist atana Serchhip District chhunga chanchinbu mite zinga mi 11 a rawn thlang chu lawmawm a tih thu a sawi a, Accreditted Journalist atana thlan anihna ang taka hmang tangkai turin a ngen bawk.

Vawiina Press Accreditation Card hlan thar te hi Serchhip khaw chhunga Chanchinbu enkawltu mi 9 leh Thawnzawla chanchinbu enkawltu mi 2, an vaiin 11 an ni te an ni.

Source: DIPR, Serchhip