SERCHHIP-AH HORTICULTURE DEPARTMENT-IN NLUP TANPUINA SEM


Serchhip, 19th August, 2015 : Vawiin chawhma dar 11:00 khan Serchhip Hmar Veng YMA Hall-ah Horticulture Department, Serchhip District chuan an hnuaia NLUP Second Phase tanpuina dawngtute hnenah tanpuina sum Final Installment an sem.

NLUP sem inkhawm hi Pi Zosiamliani, DHO Serchhip in kaihruai a, inlawmna thu sawiin, NLUP dawngtute chu an pawisa dawnte anihna taka hmang turin a chah a, loneitu te chu an thlai phun te duat taka enkawl a pawimawhzia a hrilh a, phun tawpa, enkawl ngaithah leh si a, a rah seng tum ringawt lovin, thlaiin an mamawh ang enkawlna pe tura theihtawp chhuah turin a chah a, duat taka thlai enkawlte chu an dam rei bik a, a rah seng theih chhung pawh a rei bik thin a ni a ti. NLUP tanpuina dik taka hmangtute chu NLUP tanpuina piah lamah pawh Departmentin theihtawpa tanpui zui an inhuam thu a sawi bawk.

Horticulture Department hnuaiah hian NLUP Trade pathum – M.Orange, Lakhuihthei (Pineapple) leh Tung awmin, 2nd Phase-ah M.Orange thlangtu beneficiary hi Serchhip ah 82, Chhiahtlang ah 12, Bungtlang ah 3, Keitum ah 4, Hriangtlang ah 3 an awm a. Lakhuihthei chin thlangtu hi Serchhip ah 62, Chhiahtlang ah 25, Bungtlang ah 6, Keitum ah 6 awmin, Tung chin thlangtu hi Serchhip ah 2 leh Chhiahtlangah 3 an awm a. Vawiina tanpuina sem zawng zawng hi mi 208 niin M.Orange thlangtu chhungkaw 104, Lakhuihthei (Pineapple) thlangtu chhungkaw 99, Tung thlangtu chhungkaw 5 an ni a, sum hi Rs. 65,32,020/- sem chhuah a ni a, Keitum leh Bungtlang khuaa beneficiary te hi pawisa faia pek niin a bak zawng chu an bank account-ah thun sak an ni a, Tanpuina sum sem zawh hnuah hian M.Orange chin dan leh enkawl dante Pi Lucy Zaithangpuii, HDO Serchhip Division chuan loneitute a zirtir nghal a ni.

Naktuk hian Chhingchhipah Horticulture Department hian an hnuaia NLUP 2nd Phase beneficiary te tanpuina sum an sem chhunzawm ang.

Source: DIPR, Serchhip