SERCHHIP DISTRICT EDUCATION COMMITTEE THUKHAWM


Serchhip: 19th July, 2013: Vawiin chawhma dar 11 khan Serchhip DC office chamber-ah Serchhip District Education Committee chu an chairman Pi Juhi Mukherjee, IAS District Bawrhsap ni bawk hovin an thukhawm a, kum 2013-14 chhunga Serchhip District a SSA Mission kalpuina tur atana PAB in Budget a ruahman sak te thlir ho anih bakah hmalakna tura hmachhawp te sawihova pawm nghal a ni bawk.

Meeting kaihruaitu District Bawrhsap chuan tunhnaia Bihar a Saran District chhunga khaw pakhat Chhapra a mid-day meal ei vanga boral zirlai naupang 23 te chhungte a tawrhpui thu leh pawi a tih thu a sawi a, hetiang thil hi a thlen ve loh nan; Serchhip District a mid-day meal scheme kalpui mek school te pawh fimkhur lehzual tura a ngen thu a sawi bawk a ni.

SSA District Project Co-ordinator, Pu Lalthanzira chuan kum 2013-14 chhunga Serchhip District SSA Mission kalpui nan Sawrkar Laipui in Rs. Nuaih 825.3957 a ruahman fel sak tawh thu a sawi a, heng zinga Rs. Nuaih 304.6 chu kum 2012-13 ami ‘spill over’ anih thu sawiin sum hman tur a tam loh avangin inrenchem tak leh fimkhur lehzuala hnathawh a ngai dawn a ni a ti a, Budget pangngai Rs. Nuaih 520.7957 atangin Rs. Nuaih 230 vel chu hnathawktute hlawh ah hman a ngaih dawn thu a sawi bawk.

Vawiin meeting ah hian Serchhip District khaw tinah Primary School leh Middle School din kim vek anih thu tarlan a ni a, kum 2013-14 chhung hian Primary School thar PTC Thenzawlah sak tur niin a sakna tur pawisa pawh a awm vek tawh a, sak zawh fel anih veleh PTC Thenzawlah tho hian Middle School sak chhunzawm lehnghal ani dawn a ni. Hei bakah hian Bawktlang P/S chu thuam that tur a ni a, District chhunga Primary School hrang hrang 9 sak that ani dawn bawk a ni.

DPC chuan kumin atangin Girls’ Education atan tanpuina sum (fund) a tawp tawh a, Girls’ Hostel bik erawhchu Access hnuaiah enkawl chhunzawm phalsak an nih thu a sawi a, Chhingchhipa Girls’ Hostel seat 26 awm thin chu 50 awm theihna turin tih len anih thu leh, zirlai hmeichhe naupang kum 6-14 inkar (Class 1-8) tan dil theih anih thu a sawi bawk. Hei bakah hian School tinah Mizoram Science Journal chu supplementary reading material atan pek ani bawk a ni.

Mid-day Meal Scheme District chhunga kalpuianih dan pawh thlir nawn a ni a, Sawrkar Laipui dan dinglai, ‘mid-day meal sem dawnin zirtirtuten an tem hmasa phawt ngei ngei tur a ni’ tih chu zawm that nu viau mah se inhrilhhriat leh a pawimawh thu sawi a ni a, Bawrhsapin zirlaite mid-day meal semna a a kal apianga dal leh buhfai deuh hlir a hmu thin thu leh, a chang chang a chawhmeh variety thlak dan ngaihtuah tha a tih thu a sawi chu sum dinhmun a zira tihdan ngaihtuah tum a ni bawk.

District Bawrhsapin zirlaiten an career atana rilru an siam theih nan leh awmze nei zawka lehkha an zir thiam theih nan, ‘exposure’ an mamawh thu sawiin; hemi atan hian Serchhip District chhunga Higher Secondary School hrang hrang panga a zirlaiten, District chhunga Sawrkar Pisa hrang hrang leh Bank hrang hrangte hnathawh dan zirchianna hun an neih theih nan ruahmanna a siam thu leh, Sawrkar Pisa hrang hrang leh Bank hotu te pawh a dawr tawh thu te, an inhawn thu te a sawi a, memberte pawhin tha an tih thu sawiin, DEO in ruahmanna siam se, a bul tan nan DC Office hmangin a hma thei ang bera he ruahmanna hi kalpui tum a ni a, zirlaite an zirlai tibahlah lo tura a zing thei ang bera he ruahmanna hi kalpui tum a ni bawk.

Source: DIPR, Serchhip