DAN PHAL LOH CIGARETTE ZAWRHTE MAN


Dated Serchhip, the 19th January, 2017: Serchhip District Legal Metrology Department te chuan tun hnai khan District chhung khaw thenkhat, Baktawng, Khumtung, Keitum, Bungtlang leh Chhingchhip a sawrkar danin a phalloh Foreign Cigarette zawrhte an vai a, Section 6,7,8 & 20 of The Legal Metrology (PC Rules) 2011 bawhchhia meizial bawm 721 an man.

Legal Metrology Inspector Pu Lalsangzuala chuan, meizial hi mihring taksa tana tha lo, Cancer leh natna dang tam tak thlen thei a nih avangin dan hnuaiah a thatlohna hi meizial bawmah a lem leh ziaka tihlan ngei tur a ni a, a siamtute hming leh address pawh tihlan tur a ni. The Legal Metrology (PC Rules) 2011 chuan a tih dan tur chiang takin meizial siamtute chu a kawhhmuh a ni. He dan bawhchhiate hi District chhungah ngawrh taka vai reng a ni a, tun hnaiah pawh a dap hna hi thawh niin bawm 721 lai man a ni a, a zuartute pawh hetiang meizial hi zuar tawh lo tura hrilh an ni, a ti.

Pu Lalsangzuala chuan, heng an man te hi dan anga tihral a nih tur thu sawiin, boruak bawlhhlawh a siam loh nan tuia an leih zawp vek hnua Dumping Yard a an paih thin thu a sawi a ni.

Source: DIPR, Serchhip