SERCHHIPAH “FIRE PREVENTION WEEK, 2015” HAWNNA INKHAWM NEIH A NI


Serchhip, 19th January, 2015: Serchhip District Level Fire Prevention Committee hmalakna in vawiin chawhma dar 11:00 khan Serchhip Bazar kawn ah “Fire Prevention Week, 2015” (January 19-24) hawnna inkhawm buatsaih a ni a, Hrangturzo bialtu MLA Pi Vanlalawmpuii Chawngthu chuan khuallian niin “Fire Prevention Week, 2015” hi a hawng a ni.

Hawnna thusawitu Pi Vanlalawmpuii chuan Mizoramin hma a sawnna tur leh mipuiten eizawnna changtlung tak kan neih theihna turin ram leilung hrisel kan mamawh a, chumi tur chuan ram kang laka kan in ven that a pawimawh hle a ni a ti a, ram kang hi tam hmahruai a ni a, kan lo neih tur te, leilet siamna tur te a tihchhiat bakah tuihna a tichhia in boruak, sik leh sa a tichhia a, nungcha tam tak a suat bawk a, ram kangin ngai awh leh tur chuan kum tamtak nghah a ngaih thin avangin kan intodelhna tur min daltu a ni a ti bawk.

Ram tikangtu te chungah Sawrkarin khauh lehzuala Dan lek kawh a tum tawh thu sawiin Pi Awmpuii chuan ram tikangtute mai bakah a zep puitu te thlengin Dan hnuaiah an phu tawk a hrem an nih tawh tur thu a sawi a, Sawrkarin ram a kan lohna tura theihtawp a chhuahna ah hian mipuiten tha taka kan tawiawm a ngai a ni tiin Sawrkar, Khawtlang hruaitute leh YMA hruaitute thu awih a ngaipawimawh turin mipuite a ngen a ni.

Pu R.L.Chhuanawma, President, Sub-Headquarters YMA, Serchhip pawhin thu sawiin nikumah mualphothlak takin Serchhip ram a kang a, kar hnih chhung kang thelh turin Serchhip khaw pumpui an buai a, hetiang a thlen tawh lohna tur hian YMA ten theihtawp an chhuah dawn thu leh YMA Branch hrang hrangte pawh duty tur an inruat dawn thu a sawi a, ram tikang an awm leh anih chuan hremna na thei ang ber pek an nih ngei theih nan YMA in hma an lak dawn thu a sawi bawk.

Thusawitu dang Pu Kapliana Pachuau, President, MJA, Serchhip District pawhin ram kang bakah In kang te pawh ven tel a tul thu sawilangin MJA member te pawhin an theihtawpa Kangmei ven chungchang zirtirna mipui hnena pek an tum thu a sawi a ni.

Pu Lallianzuala, DFO, Thenzawl, District Level Fire Prevention Committee a Member Secretary ni bawk chuan Report pe in Kangmei ven kawnga District Level Fire Prevention Committee in ruahmanna a siam te mipui hriatah a puangzar a, Tlangau leh YMA Information Centre kaltlang a ram tikang lo tura mipuite ngenna siam anih tur thu te, Kohhran zawng zawngah Kohhran inkhawma chhiarchhuah turin ngenna siam anih tur thu te sawiin, heng bakah hian Banner leh poster thahnem tak tar ani ang a, Tualchhung chanchinbu leh Cable Network ah te a tul anga Advertisement anih bakah YMA Chanchinbu kaltlangin mipuite hnena ngenna siam ani bawk ang. District Bawrhsap in Ram tikang lo tura mipuite hriattirna/khapna (Prohibitory Order) a chhuah ang a, District chhunga ram kang ven kawnga hna thawk tha khua panga thlan a ni ang a,Tualchhung chanchinbute zinga ram kang ven lam hawi zirtirna pe tha pathum leh Cable Network pahnih thlanchhuah a ni bawk ang.

Fire Prevention Week, 2015” hawnna inkhawm hi Pu V.L.Remliana, MCS, Additional DC, Serchhip in a kaihruai a, Serchhip khawpuia Sawrkar Department hrang hrang hotute, YMA Branch hrang hrang aiawhte, VC aiawhte leh thuthar thehdarhtute an kal tha hle a ni.

Serchhip rual hian North Vanlaiphai ah DFO hovin “Fire Prevention Week, 2015” hawnna inkhawm hi neih a ni bawk.

Source: DIPR, Serchhip