SERCHHIP KHAW CHHUNG HIGH SCHOOL ZIRLAI NAUPANGTE TAN CAREER GUIDANCE PROGRAMME BUATSAIH


Dated Serchhip, the 18th November, 2016: Vawiin chawhma dar 11:00 hian Serchhip Bethel Branch KTP, Mesaka Group leh Mizoram Youth Commission tangkawp chuan Serchhip P&E Veng YMA Hall-ah Serchhip khaw chhunga High School zirlai naupangte tan Career Guidance Programme an buatsaih.

He hunah hian Pu R. Sanghmingthanga, President, Sub Hqrs. YMA Serchhip chu khuallian a ni. Khuallian chuan Mizote hian intodelh kan ngaihpawimawh a tul thu sawiin, mimal, chhungkua leh ram a intodelh loh chuan a huaisen theih loh ani a ti. Hnam dang tel lova in kan sa hleithei ta lo chu tan kan lak a tul thu sawiin, hnam dang Cement Mistiri te hian ni khatah Cheng 500-700 vel an hlawh mek thu sawiin heng sum leh pai tam tak te hi an ramah an hawn thla zel a, hei vang hian intodelh turin Mizo ngei Cement Mistiri neih tam a tul thu a sawi. Pu Sanga chuan Zirlai te chu an zirlaia theihtawp chhuah tura fuihin mahni intanpui chu Pathian pawhin a tanpui thin a ni tih hre reng in, mi zawng zawng kan vannei vek dawn lova, hna ropui kan thawh vek dawn loh avangin kan thiltih apianga hlawhtlinna kan chan theihna turin taimakna leh tih tak tak na nena beih a hun tawh a ni a ti a, retheihna avanga hlawhtlinna neite thawhrimna te sawiin, zirlai kallkhawm te chu “Theihtawp chhuah rawh u, kan ramin a thlir mek che u a ni’ tiin a chah.

He hunah hian Pu H. Vanlalchhanchhuaha, IAS, Co-ordinator Mizoram Youth Commission leh SSC Coaching Centre leh Anirban Mukherjee, Consultant (Skill Development) ten zirlai naupang te hnenah an zirlai leh eizawnna kawnga an hriat tur pawimawh hrang hrang te zirtirna an pe a, Serchhip Town chhunga High School hrang hrang - Govt. High School Serchhip, Zoluti Memorial High School, Presbyterian English School, Marian High School leh Eklavya Model Residential School a zirlai naupang thahnem tak an kalkhawm a ni.

Source: DIPR, Serchhip