SERCHHIP VENGCHUNGAH NU LEH NAUSEN HRISEL CHUNGCHANG ZIRTIRNA HUN HMAN A NI


Dated Serchhip, the 18th October, 2016: Vawiin chawhma dar 10:00 khan Serchhip Village Council –I huam chhunga Village Health Sanitation & Nutrition Committee buatsaihin Nu leh Nausen Hriselna chungchanga inzirtirna hun Zoluti Hall Serchhip Vengchungah buatsaih a ni.

He hunah hian Dr. Samuela, Medical Officer, National Health Mission, District Hospital Serchhip chuan thu sawiin India ramah nu nau chunga thi leh nausen thihna a tam em em a, chumi tih tlem nan chuan theihtawpa tan kan lak tlan a tul a ni, a ti. Kawng hrang hrangah hma sawnna nei mah ila Nausen thi an tam chhung chuan ram changkang kan ni thei ngai dawn lova ni a ti. Nu in nau a pai atanga a hrin hnu thlenga inenkawl uluk a tul zia leh nu nau chunga thi tih tlem leh nausen thi ti tlem tura hma lak a tul dante sawiin, sawrkar laipui pawhin a ngai pawimawh a, nu leh nausen tan hamthatna dawn tur thlenga a buatsaih thu sawiin heng hamthatna dawng thei tur erawh chuan nu in nau a pai tan tirh atangin Health Sub- Centre ah in entir thin a tul a ni a ti. Nu leh naute hrisel taka an awm theih nana in enkawl dan tur thil hrang hrangte sawiin, sawrkarin ruahmanna a siamte chhawr tangkai turin kalkhawmte a chah a ni.

He hun hi Dr. Laldawngliana Sailo, CMO Serchhip pawhin hmanpuiin kalkhawmte chu hriselna ngaipawimawh tur leh nitina khawsakna kawngah thianghlimna nunpui tlat turin a chah a ni.

Village Health Sanitation & Nutrition Committee-in an huam chhunga mahni in leh a vel vawngfai chawimawina an siam mi pali te hnenah Dr. Laldawngliana hian chawimawina thu ziak a hlan nghal bawk a ni.

Source: DIPR, Serchhip