SERCHHIP DISTRICT DISASTER MANAGEMENT AUTHORITY THUKHAWM


Serchhip: 18th July, 2013: Vawiin chhun dar 12 khan Serchhip DC Office Chamber ah Serchhip District Disaster Management Authority (DDMA) chu an Chairman Pi Juhi Mukherjee, IAS, Serchhip Bawrhsap ni bawk hovin an thukhawm a, District chhunga chhiatrupna lo thleng thei hmachhawn dan tur a ruahmanna chi hrang hrangte an sawi ho a ni.

Vawiin District Disater Management Authority thukhawm hian Capacity Building Fund 2011-2012 hnuaia pawisa Rs. 50,000/- an hmuh atangin District Disaster Management Plan siam that a, a bu felfai taka siam a, Serchhip District chhunga Sawrkar Pisa hrang hrang hotute leh, Joint VCP leh YMA te hnenah pek turin ruahmanna a siam a, hei bakah hian chhiatrupna lo thleng thei laka invenna mipuite hnena zirtirna tur atan Documentary Film siam a, District chhung khawtina tih chhuah anih theih nan ruahmanna an siam bak ah, Serchhip khawchhunga Higher Secondary School leh College zirlaite tan Quiz hmanga inelna thianghlim buatsaih an rel bawk.

Serchhip District tan Disaster Emergency Operation Centre mumal taka din a nilo chu a vei thu sawi chhuakin Bawrhsap chuan Sawrkar Laipui duhdan (Central Government norms) ang taka Disaster Emergency Operation Centre, building hran hlak sak anih theih nan hma lak a tum thu leh an hmanraw neih sa te dahthatna tur storage room tur pawh mumal tak siam tel nghal a tul thu a sawi bawk.

Vawiin thutkhawmah hian Serchhip District chhunga hman tur chhanchhuahna hmanrua an la neih te report thlir ho a ni a, hmanraw thenkhat a chhia thlak ngai leh a thar lei ngai te, siamthat ngai te sawiho niin sum hman tur neih dan azira hmalak tum a ni a, Serchhip District chhunga Master Trainer mi pasarih, ATI Aizawla training chhuakte chu District chhung khawtina mipuite zirtirna pe chhawng tura tirhchhuah tum an ni a, an kal hma in District Disaster Management Authority ten an kawm chiang hmasa ang a, a tul chuan hmunpui lam atangin trainer pawh chah belh dan an ngaihtuah dawn a ni.

District Hospital leh District chhunga hmun pawimawh zual deuh deuh ah te disaster management lama an inbuatsaih dan endik a, an mamawh leh tlakchhamna te zirchian bakah pawisa hman tur neih veleh Mock-Drill lian tham deuh buatsaih tum a ni a, hemi hma hian a rang lamin DC office complex ah Mock-Drill neih thuai tum a ni bawk.

Emergency Operation Centre hotline no. 1077 (toll free) hi Serchhip District a bun a la ni lova, mipuiten a thlawna rang taka khuarel leh mihring thlen chhiatna chi hrang hrang thuneitute an hrilh zung zung theihna tur a hmanraw tangkai anih avangin he number hi tihnun thuai anih theih nan hmalak tum anih bakah; chhiatrupna laka invenna atana inzirtirna tura ruahman posters, leaflets leh stickers te chu District chhung hmun hrang hrang a semchhuah thuai tum a ni bawk.

Source: DIPR, Serchhip