SERCHHIP BAWRHSAP HOVIN CVJAC NAWRH CHHUNGA MIPUI HARSATNA PHUHRUK DAN TUR RUAHMANNA SIAM


Serchhip, 18th May, 2016 : Vawiin chawhma dar 11:00 khan Serchhip District Bawrhsap Dr. Lalrozama, IAS hovin a pisa ah Serchhip-a Sawrkar official pawimawhte an thukhawm a, Commercial Vehicles Joint Action Committee (CVJAC) ten tiamchin awm lova nawrh an huaihawtin Serchhip District mipuite a nghawng dan tih nep dan tur an ngaihtuah.

Vawiin chhun thlenga report dawn danin Serchhip District ah chuan Serchhip khawpui bak khaw dang te chu a nghawng na lutuk lem lovin mihring nunphung a tikhaihlak lem lo niin hriat a ni a, Serchhip khawpui chhungah pawh mipui mimir nunphung a nghawng nasa lutuk lem lo chungin abikin sikul naupangte leh damlo na zual te tana harsatna awmtheite sawiho a ni a, a sutkian dan tur hetiang hian ruahmanna siam a ni.

1. Damlo na zual leh buaipui ngai emergency a damdawiin pan pui ngai an awm chuan District Hospital Ambulance englai pawh a koh theih reng tura duty tir a ni ang a, District Hospital Casualty Phone No. 03838-226176 ah biak pawh reng theih a ni ang. Ambulance a indaihloh palh thut a a thla veng atan DC motor inralrin tir a ni bawk ang.

2. Zirlai sikul naupang ten harsatna an tawh loh nan Sawrkar Department Bus awm ang ang te zirlaite sikul kai tur lam khawm a thlah leh turin service tir an ni ang a, naktuk May ni 19, 2016 atang hetiang hian an service ang.

Power & Electricity Department Bus : Zing dar 7:00 ah Chhiahtlang kawn atang a chhuak ang a, Bukpui, Kikawn, College Peng leh IOC Peng ah te zirlai naupangte a lam khawm ang a, P&E Veng lamah tlan chhovin DRDA Office kawt zawlah passenger te an chhuk ang a, Serchhip Bazar kawn panin a tlan thla leh ang a, naupang sikul kal tur te Bazar kawn atang DRDA office kawt thleng a phur chho ang.

Health & Family Welfare Department Bus : Zing dar 7:00 ah Darnam Kawn atanga chhuakin ZOAR Peng leh Gate Kawi ah te naupang sikul kal tur a lam ang a, Serchhip Bazar tlan tlangin DRDA Office kawt zawl thleng a tlan ang.

Zirlai naupang sikul bang thlah dan tur pawh hetiang hian ruahmanna siam a ni :

Chawhnu dar 2:00 ah DRDA Office atang Bus pathum an chhuak ang a, heng Bus te tlan dan tur chu:-

Power & Electricity Department Bus : DRDA Office atanga chhuakin hmar lam panin IOC Veng lamah a tlan ang a, Chhiahtlangah a tawp ang.

Govt. Serchhip College Bus : DRDA Office atanga chhuakin hmar lamah a tlan ang a Serchhip AOC pengah kualin chhim lam panin a tlan let ang a Govt. Serchhip College peng thleng a tlan ang.

Health & Family Welfare Department Bus : DRDA Office atanga chhuakin hmar lamah a tlan ang a, Serchhip Bazar tan tlangin Darnam veng thleng a tlan ang.

Heng ruahmannate hi CVJAC nawrh tihtawp hma chu kalpui a ni ang.

Bawrhsap chuan Sawrkar Department zinga Bus nei chhun ten mipuite rawngbawlna anih hria a phut let nei miah lova an Bus te an thawhchhuahpui chu lawmawm a tih thu sawiin Department hrang hrang hotute inpekna ah lawmthu a sawi a ni.

Source: DIPR, Serchhip