SERCHHIP BAWRHSAP HOVIN REPUBLIC DAY 2016 ATANA INPUAHCHAHNA THLIR HO


Serchhip, 18th January, 2016 : Vawiin chawhma dar 11:00 khan Serchhip District Bawrhsap Dr. Lalrozama, IAS hovin DC’s Meeting Room-ah Serchhip a Department hrang hrang leh tlawmngai pawl hrang hrang aiawhten Republic Day, 2016 Serchhip-a hman tur atana inpuahchahna kal mek an thlirho a, Department hrang hrang te hmalakna te ngaihthlak niin, programme duan sa te pawh sawiho a pawm nghal a ni bawk.

Serchhip-a Republic Day lawmna inkhawm hi DC's Playground, Khawtetlang, New Serchhip a neih tura ruahman a ni a, January ni 26, 2016 chawhma dar 11:00 ah tan a ni ang a, District Bawrhsap Dr. Lalrozama, IAS chu khuallian a ni ang.

Republic Day zing ni chhuah rualin Sawrkar pisa zawng zawngah India Hnam Puanzar khai vek tur a ni a, CDPO, Serchhip leh Sub-Hqrs YMA, Serchhip January ni 26, 2016 zingkar ah JNM Hospital (Poor Fund), Salvation Army Old Age Home, Lalchhungkua Orphanage Home, Zoar Deprived Children’s Home leh Shalom Special School ah te Republic Day lawmna thilpek sem a ni ang. Republic Day lawmna ah hian Parade Contingent 15 (Armed-2, Unarmed-2, School-11) an tel ang a, lawmman sem ani bawk ang. Republic Day lawm tura kal naupang ho zawng zawng hnenah chithlum sem a ni ang a, 166 bn. BSF, Serchhip Dawngzawl ami ten an ralthuam te mipui hmuh theih turin an pholang bawk ang. Republic Day lawmna inkhawm zawh fel a nih hnu hian mi pawimawh sawm bik te pualin chhun dar 12:30 ah DC Bungalow ah DC’s at Home neih ani bawk ang.

Bawrhsap chuan Department hrang hrangte inbuatsaihna leh inpekna bakah thawhona tha avangin lawmthu a sawi a, Republic Day hlawhtling taka lawm anih theih nan theihtawp chhuah theuh turin a ngen bakah he hun hman pui tur hian Serchhip mipui zawng zawngte a sawm nghal bawk a ni.

Source: DIPR, Serchhip