USA MITHIAM TEN ZOTE’S’ KHUA AN TLAWH


Serchhip: 18th January, 2013: Nimin chawhnu khan Minnesota university atanga mithiam lo kal te chuan Thenzawl bula Zote’S’ khua chu tlawhin BNRGSK building ah khawtlang mipuite nen inkawmhona hun tha tak an hmang a ni.

Zote’S’ hi in 149 awmna khua a ni a an zinga in za a sawmriat (80%) vel chuan tlang ram lo neih an la kalpui thu khawtlang hruaitute chuan mithiamte hi an lo hrilh a, kum tina ram an vah thin pawh NLUP kalpui anih hnu hian a letin a zim tawh thu lo sawiin an zinga chhungkaw 28 in NLUP Trade atan Coffee Plantation an thlan thu leh, tunah hian Sawrkar hmalakna in a khaw pumpuiin Coffee chin an tum tak thu an sawi a, tlangram loneih bansan an chak thu leh NLUP kaltlang hian reilote ah tlangram loneih chu an bansan theih an inbeisei thu mithiamte hi an lo hrilh a ni.

Mithiamte zawhna chhangin khawtlang mipuite chuan Coffee chin dan tur pawh training an neih tawh thu te, Coffee hralhna lama harsatna an tawh an in rin loh thu leh Lunglei a Coffee Board kaltlangin anmahni Coffee china hmun ngeiah an coffee te leisak an nih dawn thu an sawi a, an khua in reserved forest an neih that thu te leh an ramngaw te awmze nei zawka humhalh anih theihna kawnga puih an mamawh thu te an sawi bakah, thlai leh theirah chin kawnga harsatna an tawh dan te, tuihna an neih that loh thu te leh an harsatna chi hrang hrang an thlen te chu chhangin mithiamte chuan, tanpuina sum pe thei tu an nih loh thu leh an harsatna te chu theihtawp chhuah a zirchian chhunzawm zel a, an tana hmalak dan tur tha ber ngaihtuah chhuahpui tura tan an lak dawn thu an sawi a ni.

Mithiam rual te hian nimin tlai khan Lunglei pan in Zote ‘S’ khua hi an chhuahsan leh nghal a ni.


Source: DIPR, Serchhip