INDUSTRY DEPARTMENT-IN SERCHHIPAH NLUP SEM


Serchhip, 17th December, 2015 : District Industries Centre Serchhip chuan vawiin chhun dar 11:00 khan DC’s Conference Hall, Serchhipah NLUP 3rd & 4th Phase dawngtute hnenah tanpuina an sem a, District Bawrhsap Dr. Lalrozama, IAS chuan Khuallian niin he hun hi a hmanpui a ni.

Khuallian chuan thu sawiin, Sawrkar Flagship Programme pawmawh tak NLUP tanpuina sem chungchangah hian harsatna engemaw a awm thin tih hriaiin, District Level Committee chuan tanpuina sum sem rual hian a dawngtute hnenah training pek theih nise tih hi a duh dan a ni a, Industry Department-in hetiang hun an buatsaih thei leh tanpuina dawngtu mi thahnem tak an lo kalkhawm thei chu lawmawm a tih thu a sawi a, Industry Department chu Department lian tak, NLUP Trade nei tam ber an ni chunga tanpuina sum an sem chhuak vat thei chu fakawm a tiin tanpuina sum sem thei tura an thawhrimnaah lawmthu a sawi a ni.

NLUP tanpuina sem chungchangah hian District Level-a chinfel theih loh harsatna engemaw zat a awm thin a, Sawrkar ruahmanna anga kan hmalaknaah te hmasawnna kan neih chak theih zawk nan kan tui vak lohna trade-a awmte pawh kan awm maithei a, kan tuina tak ni vek lemlo mahse, tanpuina sum dawnte chu a hmanna tur diktaka hmanga, hlawhtlinna chang ngei tura hnathawk turin kalkhawmte fuihin duhsakna a hlan a ni.

Pu R. Laltanzuala, Industrial Promotion Officer, Serchhip chuan Report pe in, vawiinah hian beneficiaries 737 te hnenah Tanpuina sum cheng Vaibelchhe khat, nuai sawmpakhat leh sing ruk (1,11,60,000,00) chu bank kaltlanga sem a ni a, Industry Department hnuaiah hian trade hrang hrang 22 awmin, 3rd Phase ah trade 18 thlan a ni a, 4th Phase ah Trade 16 thlan anih thu a sawi a, tun tumah hian beneficiary hming thlak tura NIB lama dil mekte leh enchian leh deuh ngaite leh chhan eng eng emaw avanga tanpuina sum la pek chhuah rih loh tur engemaw zat an thu a sawi bawk.

Vawiin NLUP sum semna hi Pu V. Lalrinawma, Sub-Divisonal Industries Officer, Serchhip in a kaihhruai a, Beneficiaries ten an Trade thlan theuha an hmalak dan tur leh sum hman dan turte inhrilhhriatna hun hman niin, Beneficiaries te atangin thusawina hun leh zawhna leh chhanna hun hman ani bawk.

Source: DIPR, Serchhip