SERCHHIP AH NDRF TEN HEAD OF OFFICES TE TAN DISASTER TRAINING BUATSAIH


Dated Serchhip, the 17th October, 2016: Vawiin hian 1st Battalion National Disaster Response Force, E Company te chuan Head of Offices te tan Serchhip DC Conference Hall ah Disaster chungchanga hriat tur pawimawh zirhona hun an buatsaih a.

Chhiatrupna hmachhawn dan zirna hunah hian Addl DC Pu VL Remliana chuan thu sawiin vawiinah hian Serchhip mipui zawng zawngte hmuh phak leh tel theih tura inzirtirna hi kalpui duh viau mah ila remchan lohna engemaw a awm avangin Head of Office te tan buatsaih a ni rih a, hetiang inzirtirna hi a tam thei ang ber neih tura hmalak chhoh zel a ni ang, a ti. Officer te chu an hnuaia mite hrilh chhawng thei tur leh mipui zirtirtu ni thei tura inbuatsaih tur te, thil tul apiang hriat chian ve vek tum turtein a chah a ni. Kumin kum tawp lamah a remchan dan angin NDRF te bul tuma Serchhipa Mock Drill lian tham tak buatsaih a nih tur thu a sawi bawk.

He training ah hian Pu R K Arhson, Inspector, E Coy, 1st Bn NDRF chuan a lem nena entir leh a taka a tih theih ang ang a taka ti chung zelin chhiatrupna lo thlen hmaa kan tih tur te, a lo thlen laia kan tih turte leh a thlen zawh hnua kan tih tur pawimawh zualte a sawifiah a. NDRF hnathawh dan leh an inzar pharh dante sawifiahna hun a hmang bawk.

Inspector RK Arhson chuan, Mizoram leh NE India ramah lirnghing lian tham thleng thut reng thei a nih avangin tam zawk leh nasa zawka a inven dan zirtirna kalpui zel a pawimawh thu sawiin; Mizoram sawrkar hmalakna tha tak hmuh tur awm chu a fak a, sawrkar hnathawk leh Police ta mai nilova YMA leh tlawmngaipawl te training pek belh zel a tul tak zet thu a sawi bawk.

National Disaster Responce Force te hi India rama Paramilitary Force hrang hrang panga atanga thlan khawm sipaite hmanga din niin tunah hian Battalion sawm pahnih an awm mek a. 1st Battalion te hi Gauhati ah inbunin an ni hi India hmarchhak lam chang tura dah an ni. Battalion tin te pawh hi Team rukah inthen darh lehin chanpual an nei hrang leh vek a, vawiina Serchhipa training buatsaih tura lokal ā€˜Eā€™ Company te hian Mizoram hi an vil a ni.

Source: DIPR, Serchhip