SERCHHIP DISTRICT ANTI-TOBACCO SQUAD TE KHAUH LEHZUALIN KAL DAWN


Serchhip, 17th October, 2014: Vawiin chawhma dar 11:00 khan Serchhip DC’s Meeting Roomah Serchhip District Anti-Tobacco Squad te chu an Chairman, District Bawrhsap ni bawk Pi Juhi Mukherjee, IAS hovin Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 (COTPA) khauh lehzuala kalpui dan tur ngaihtuahin an thukhawm a, Pi Vanlalzari, District Coordinator, MSTCS in he hun hi a hmanpui bawk a ni.

Serchhip District Anti-Tobacco Squad te hmalakna leh thahnemngaihna fakin an Chairman chuan thla hmasa a vaihlo leh a kaihhnawih do kawnga Mizorama tithe ber dawttu District an nih theih phah ani a ti a, nakkumah chuan pakhatna ni ngei tura tan lak a tul thu a sawi. Bawrhsap hian mipuite meizu thin leh vaihlo kaihhnawih ngawlvei tawh te chu bansan tura nawrluih a har tawh a; an sim theilo anih pawhin COTPA dan tal hi chu an zawm theihnan theihtawp chhuahpui a tul thu a sawi a ni.

Serchhip District Anti-Tobacco Squad hian June ni 16, 2012 atanga October ni 17, 2014 thlengin Squad Drive vawi 33 nei tawhin COTPA dan bawhchhia 310 an man tawh a, Serchhip khaw chhung bakah District chhunga khaw hrang hrangah te Squad Drive hi neih thin a ni.

Vawiin thukhawm hian Village Council zawng zawngte Anti-tobacco Squad tinung thar leh tura hmalak an rel a, Myanmar atanga cigarette rawn lut thinte pawh dan in a phalloh avangin khauh taka hmalak an tum a, puipunna hmun hrang hrang Community Hall etc. ah te COTPA in a phut anga chhinchhiahna tha tak tar ani ang a, Sawrkar Pisa, Zirna In leh Vaihlo leh a kaihhnawih zawrhna dawrah te chhinchhiahna hi tar vek a ni bawk ang.

Source: DIPR, Serchhip