PRIME MINISTER KRISHI SINCHAYEE YOJANA (PMKSY) - DISTRICT LEVEL MEETING NEI


Dated Serchhip, the 17th August, 2016: Vawiin hian Serchhip Bawrhsap Pisaah Prime Minister Krishi Sinchayee Yojana (PMKSY) District Line Department te chu an Chairman leh Serchhip Bawrhsap ni bawk Dr. Lalrozama, IAS hovin an thukhawm a, District Irrigation Plan buatsaih fel thuai dan tur an rel.

Vawiina Bawrhsap Pisaa District Level PMKSY thukhawm te chuan he Scheme hnuaia Serchhip District chhunga District Irrigation Plan siam dan tur ruangam sawi khawmin, Line Department hrang hrangte tih tur hmabakte sawi khawm a ni a. District Plan hi State Level Committee ah la thehluh tur niin, State Level in a lo pawm chuan sawrkar laipui lamah thawn thlak a ni ang.

Chairman, Dr. Lalrozama IAS chuan, kan rama tui hna kan neih te tangkai zawk leh hlawk zawka kan hman thiam phawt chuan buh leh bal tharchhuah lamah nasa takin hma kan sawn pui thei dawn a, kum khat chhungin thlai pawh vawi hnih vawi thum kan tharchhuah phah thei dawn a ni. Chuvang chuan Line Department ten hmathlir thui leh rintlak tak nei chunga ruahmanna (Plan) kan siam ngei theih nan theihtawp kan chhuah tlan a ngai a ni, tiin Line Department Officer kal khawmte chu a chah a ni.

Sawrkar laipui Cabinet Committee on Economics Affairs in July ni 1, 2015 a phalna a pek (approval), Prime Minister Krishi Sinchayee Yojana (PMKSY) hi tangkai zawk leh hlawk zawka loneituten tui leh tuihna an hman theihna tur leh buh bal lama hlawk zawka tharchhuah kan neih theihna tura a duan niin, he Scheme hnuaiah hian Accelerated Irrigation Benefit Programme (AIBP) , Ministry of Water Resources hnuaia kalpui te, River Development & Ganga Rejuvenation (MoWR,RD&GR) te, Integrated Watershed Management Programme (IWMP), Department of Land Resources (DoLR) hnuaia kalpui mekte leh On Farm Water Management (OFWM), Department of Agriculture and Cooperation (DAC) in a kalpui mekte chu khung khawma zai khata luan za tir an ni dawn a ni.

State level ah chuan Agriculture chu Nodal Department niin Line Department ah Agriculture, Horticulture, Minor Irrigation, Soil leh Rural Development (DRDA) te an awm a. District Level ah chuan Deputy Commissioner chu Chairman niin District Agriculture Officer chu Member Secretary a ni thung. Vawiina meeting ah hian member te an kal kim a ni.

Source: DIPR, Serchhip