MINISTRY OF HOUSING & URBAN POVERTY ALLEVIATION DIRECTOR-IN SERCHHIP A "HOUSING FOR ALL" SCHEME KALPUI DAN A ENFIAH


Serchhip, 17th April, 2016 : Nimin khan Pu Brij Mohan Agrawal, Director (HFA) Ministry of Housing and Urban Poverty Allevation, Government of India chuan Serchhip a tlawh a, Serchhip khawpui chhunga VC Area hrang hranga "Housing For All Mission" hnuaia In sak tanpuina dawngtute dinhmun a hmunah kalin a enfiah.

Pu Brij Mohan Agarwal hian nimin chawhnu khan Serchhip DC Office a Video Conferencing Room-ah sawrkar mi pawimawhte leh Serchhip-a Bank Managers te kawmin UD&PA Department hnuaia Housing Loan (Credited Linked Subsidy Scheme) chungchang a sawipui a, India Sawrkar Flagship programme pawimawh tak anih avangin he Scheme hi Bank lam te pawhin ngaipawimawh a theihtawpa tawiawm tha turin a ngen bawk.

Sawrkar Laipuia Ministry of Housing and Poverty Allevation hnuaia Housing For all Scheme hi Prime Minister Narendra Modi hova ruahman niin kum 2022 hmaa India ram chhung khawpui (Urban Areas) hrang hrang a chenna In neilo zawng zawng ten chenna In an neih theuh theihna tur atana ruahmanna thar niin ni June ni 25, 2015 atanga hman tan a ni a, "Pradhan Mantri Awas Yojana (PMAY) / Housing For All by 2022" ti a a hming vuah a ni. He scheme kaltlang hian Serchhip khaw chhungah beneficiary 1000 tan ruahmanna siam a ni.

Pu Brij Mohan Agrawal hi Pu VL Remliana, Addl DC Serchhip, Pu ST Lalhmingmawia, DLAO Serchhip leh Pu R.Vanrengpuia, SDO (Sadar) Serchhip leh Department mi pawimawh dangten lo dawngsawngin "Housing For All by 2022" scheme tihhlawhtlinna tura hmabak leh chona awm te uluk taka sawiho a ni a Pu Agrawal hian Sawrkar laipui ah bawhzui ngai leh enzui ngaite a buaipui chhunzawm nghal tur thu a sawi.

Pu Brij Mohan Agrawal hian nimin tlai khan Aizawl panin Serchhip a chhuahsan lehnghal a ni.

Source: DIPR, Serchhip