NEDP HNUAIA ENTREPRENUERSHIP AWARENESS PROGRAMME HMANG


Dated Serchhip, the 17th March, 2017: Vawiin hian Serchhip DC Conference Hall ah New Economic Development Policy hnuaia hmalakna peng (Component) pakhat Mizoram State Entrepreneurship Development Monitoring Committee [MEDMOC] bul tumin Entrepreneurship Awareness Programme buatsaih a ni a, Dr. C. Vanlalramsanga, IES, Secretary, Planning chu khuallian a ni.

Khuallian, Dr C. Vanlalramsanga chuan, New Economic Development Policy chu hmasawnna ngelnghet zawk ramin a neihna tura rahbi pawimawh, ram mipuite mamawh intawm siamna Policy a nih thu sawiin, Entreprenuership Development Scheme chu NEDP hnuaia peng pawimawh tak a nih thu a sawi a. He Scheme hmang hian kan rama thalai rualte leh tuna sumdawnna nei mekte chu sang zawka chawikan a tum dawn a. Mizoram sawrkar in thalaite hma khua a ngaihtuah zia lan chianna a ni bawk ani, a ti. Pu C. Vanlalramsanga chuan, Mizoram Economy hi India ram State zinga a thang chak ber pawl a ni mek a, National Avarage hi 7% vel a nih laiin Mizoram thanna hi 9% vel a ni chho deuh reng a, Growth Driver State kan ni pha a ni. Hmasawn zel turin kan dinhmun a tha a, entrepreneur lama hmasawnna kawng pawh a zauvin a ngaihtuah peih leh umzui peihte tanpui turin sawrkar pawh a inhawng hle a ni, a ti bawk. Vawiina kalkhawm Collge zirlaite, sumdawnna kalpui mekte leh Serchhip District thalai zawng zawngte chu NEDP hnuaia Entrepreneurship Programme chhawr tangkaitu nih tum theuh turin a sawm a ni.

He hunah hian Dr. Lalrinchhana, Secretary, MEDMOC pawhin NEDP leh MEDMOC hnuaia Entreprenuership Scheme (EDS) sawihawnna a nei bawk a. Vawiina kan neih mek Awareness Programme chu EDS hna pakhat a nih thu leh District zawng zawnga neih tura ruahman a nih thu a sawi a. Tin, Micro-enterprises din tute tana a bul tanna tur ngaihtuah sakte, thalaite tana entrepreneur zirna lam uarte, Facility Centre sakte leh Knowledge Centre sak te tum chhoh zel a nih thu leh State Level master Trainer te pawh siam a nih thute a sawi a. Mahni kea din tum thalai, sumdawnna leh thilsiam lam thawktu (entrepreneur) te inkara inelna thianghlim siama, eiraltu nilova thawk chhuaktu nih lama nasa taka inbuatsaih chhoh tum a nih thu a sawi a ni.

He hunah hian MEDMOC Expert Member, Pu Joseph L. Ralte, General Secretary, Mizoram Entrepreneurship Network (MEN) pawhin Entreprenuer pawimawhna leh kan ramin a mamawh dan sawina hun a hmang bawk a. Heng thusawina hrang hrangte ngaihthlak zawh hian sawihona hun hman zui a ni.

He programme kaihruaitu, Bawrhsap Dr. Lalrozama, IAS chuan, sawrkar in thalaite hmakhua ngaihtuaha, sumdawnna te, thilsiamna lam te leh mahni kea din theihna tur hmalakna thar a duan chu a chhawr tangkai berte zinga mi nih tum turin kalkhawmte a chah a ni.

Source: DIPR, Serchhip