CABLE TV DIGITALISATION CHUNGCHANG DC HOVIN SAWIHO - PHASE III HNUAIA MITE JANUARY 31 AH ANALOG SIGNAL OFF A NI DAWN


Dated Serchhip, the 17th January, 2017: Vawiin hian Serchhip DC Pisaah Bawrhsap Dr Lalrozama, IAS chuan Serchhip District chhunga Cable TV Digitalisation Programme kalpui meka Phase III hnuaia TV Operator te meeting a neih pui a, an dinhmun leh an hmalak dante a thlir pui.

Dr. Lalrozama chuan, sawrkar laipuiin ruahmanna a siam, Cable TV Digitalisation chu Serchhip District ah pawh chak taka kalpui zel a ni a, Cable TV neitute nen inbe tawn reng chungin hna hi thawh a ni, a ti. Tun thla January 31 hi Phase 3 (notified town) hnuaia Operator zawng zawngte tana Analog Signal Off hun tura hun bituk a nih tak avangin Phase III hnuaia Operator-te chu kohkhawm an nih thu sawiin sawrkar ruahman ang takin January ni 31 ah Phase III (Census notified town) huam chhungah Analog Signal Off vek a nih tur thu leh Digital Signal hmang chauhva Cable TV signal pek chhuah tawh tur a nih thu a sawi a ni.

Vawiina kalkhawm Operator te hian a hun taka Analog Signal Off chu an tan harsatna lutuk a awm an rin tawh loh thu Bawrhsap hi an hrilh a, amaherawh chu Phase III Area Operator te hian Phase IV (thingtlang khuate) Area ah Signal pek chhuah tam tak an neih mek avangin chung Phase IV hnuaia khuate chu kumin March 31 thleng Analog Signal hi an la pe thei thung ang.

Vawiina Phase III Operator, January 31 a Analog Signal Off tawh tura tih Cable TV te leh an Phase III Area te chu hengte hi an ni, SCN- Serchhip, TT Vision -Serchhip, TCN -Thenzawl, TS Vision Thenzawl, KL Vision Chhiahtlang, KT Vision N. Vanlaiphai, Net Home N. Vanlaiphai, Biate Cable Network Biate leh Zialung Cable Network Biate te an ni.

Source: DIPR, Serchhip