SERCHHIP-AH KUMIN KUM TAWPA MLA ELECTION A HMAN TUR SERCHHIP DISTRICT PHOTO ELECTORAL ROLL TLANGZARH A NI


Serchhip, the 16th August, 2013: Vawiin chawhma dar 10:30 khan Serchip DC Office Chamber-ah, District Election Officer, Bawrhsap ni bawk Pi Juhi Mukherjee, IAS hovin 2013 kum tawp a MLA Election lo awm tur atana hman tur Serchhip District Photo Electoral Roll chu mipui hmuh theih turin tlangzarh a ni a, District chhunga election buaipuitu officialte, Recognised Political Party hrang hrang aiawhte, MJA aiawhte leh Sub-Headquarters YMA aiawhte an tel a ni.Vawiin a Photo Electoral Roll tlangzarh taka Serchhip District chhung MLA Constituency pathum dinhmun chu hetiang hi a ni:

(26) SERCHHIP CONSTITUENCY ah Polling Station 23 (Urban-21, Rural-2) awmin General Electors 15,743 (mipa-7611, hmeichhia-8132) leh Service Voters 128, an vaiin Voters 15,871 an awm a, Voters te Gender Ratio chu 1025 a ni. Roll hmasa atangin Voters 389 (mipa-191, hmeichhia-198) paih an ni a, Voters 631 (mipa-293, hmeichhia-338) dah belh an ni thung, Roll hmasa aiin Voters 242 in an pung a, a punna hi 1.54% a ni.

(27) TUIKUM CONSTITUENCY ah Polling Station 29 (Urban-5, Rural-24) awmin General Electors 14,256 (mipa-7094, hmeichhia-7162) leh Service Voters 98, an vaiin Voters 14,354 an awm a, Voters te Gender Ratio chu 1010 a ni. Roll hmasa atangin Voters 456 (mipa-208, hmeichhia-248) paih an ni a, Voters 315 (mipa-132, hmeichhia-183) dah belh an ni thung, Roll hmasa aiin Voters 141 in an kiam a, Voters zat danglamna hi 0.99% a ni.

(28) HRANGTURZO CONSTITUENCY ah Polling Station 25 (Urban-5, Rural-20) awmin General Electors 14,689 (mipa-7318, hmeichhia-7371) leh Service Voters 96 , an vaiin Voters 14,785 an awm a, Voters te Gender Ratio chu 1007 a ni. Roll hmasa atangin Voters 349 (mipa-149, hmeichhia-200) paih an ni a, Voters 277 (mipa-111, hmeichhia-166) dah belh an ni thung, Roll hmasa aiin Voters 72 in an kiam a Voters zat danglamna hi 0.49% a ni.

A zavaia khaikhawmin Serchhip District chhunga Assembly Constituency pathumah Polling Station 77 (Urban-31, Rural-46) a awm a, General Electors 44,688 (mipa-22,023, hmeichhia-22,665) leh Service Voters 322, an vaiin Voters 45,010 an awm a, Voters’ te Gender Ratio chu 1025 a ni a, Roll hmasa atanga hming paih zawng zawng chu 1194 (mipa-548, hmeichhia-646) an ni a, Roll a thun thar zawng zawng chu 1223 (mipa-536, hmeichhia-687) an ni, Final Roll hmasa atanga chhut a Voters zawng zawng punna hi 29 niin, hei hi 0.06% a ni.

State Election Commission atanga Duplicate Suspected Voters list an dawn 3000 lai chu BLO ten anmahni ngei kal a uluk taka an finfiah hnu in 412 an paih bawk a ni.

District Election Officer Pi Juhi Mukherjee chuan Serchhip District in 100% EPIC coverage an ti thei chu chhuanawm leh lawmawm a tih thu sawiin hei hi India ram State danga thil thleng zen zen lo a ni a ti a, Election Official leh Political Party te, YMA te tawiawm thatna rah a ni tiin lawmthu a sawi a ni. Electoral Roll Continuous Updation hi Inthlanpui atana Nomination File hun tawp ni thlengin updation hi tih theih a ni a, Political Party te leh YMA te pawh Electoral Roll chu lo bihchianga siamthat ngaite a awm apianga hrilh turin a ngen bawk a ni. Photo Electoral Roll thar hi Recognised National/State Political Party te leh Serchhip Sub-Headquarters YMA hnenah a thlawnin sem an ni a; mipuite hmuh theih turin BLO tin hnenah pek an ni bawk.

Source: DIPR, Serchhip