CHIEF INFORMATION COMMISSIONER IN YMA DAY HMANPUI


Dated Serchhip, the 16th June, 2017: Nimin, YMA Day vawi 82 na champha Khawlailung khuaa hmanna, chawhnu inkhawmah Mizoram Chief Information Commissioner Pu Lalduhthlana Ralte, IFS(Rtd) chuan khuallian niin hmanpui a, Mizoram Information Commission bultumin Right to Information Act, 2005 chungchang Awareness Campaign neih a ni.

YMA Day lawmna inkhawm, Khawlailung Community Hall a neihah hian chawhma lamah hun hlimawm tak hman a nih hnuin ruahman angin chawhnu lamah RTI Awareness Campaign hi neih a ni a. Pu Lalduhthlana Ralte chuan, Khawlailung thalai rualin RTI hriatchian duhna thinlung an nei leh, a zirchiang tura an hun hlu tak an hmang phal chu lawmawm a tih thu a sawi a. Khaw fingvar tak, hmasawn duhna thinlung pu an nia a hriat thu a hrilh a ni. Kumin chhunga RTI chungchanga Mizoram dinhmun tlangpui sawiin khuallian hian, Mizoram Information Commission rawn thleng pha Complaint kan dawng tam lo hle a. Hei hi SPIO leh DAA te hnathawh that vang a nih theih rualin mipuiten RTI kan hman tangkai kawngah hma kan sawn tawk loh vang a ni thei bawk, a ti a. Eirukna leh sawrkar hmalakna felhlel deuh nia lang chi apiangte chu mipuiten kan hriatpuia kan venpui thuai theih nan RTI hmang tangkai sauh sauh turin mipuite a ngen a ni.

Khuallianin thu a sawi zawh hian Pu Vanlalngena, MCS, Secretary, Mizoram Information Commission chuan thalai rual kalkhawmte chu chipchiar takin RTI chungchang leh a hman tangkai dan hrang hrangte a hrilhfiah a, thu a sawi zawhah zawhna leh chhanna hun hman zui nghal a ni.

RTI Awareness Programme bik hi Pu K. Saitluanga, District Information and Public Relations Officer, Serchhip District chuan a kaihruaia, ani pawhin Khawlailung mipui leh Serchhip District mipuite chu RTI chungchanga hriat duh leh mamawh an neihteah a hnena zawt hrehlo tura chahin, Public Relations Officer a nih angin sawrkar dawr dan leh sawrkar kalphung engkimah hriat duh an neih apiangte hrilh hre turin a inpeih reng tih a hrilh a ni.

Khawlailungah hian YMA member mipa 761 leh Hmeichhia 552, an vaiin member 1313 an awm meka, kumin hi Branch pakhat anga YMA Day an hman ho hnuhnung ber tur a ni a, Branch pathuma inthendarh tawh turin ruahmanna a kal mek a ni.

Tlai lamah khawtlang huap chawhlui kilhona neih zui nghal a ni.

Source: DIPR, Serchhip