CHIEF MINISTERIN SERCHHIP-AH MIRETHEI INSAK TANPUINA SEM


Serchhip: 15th November, 2012: Mizoram Chief Minister Pu Lal Thanhawla chuan vawiin chawhnu khan Serchhip D.C Conference Hall-ah Integrated Housing & Slum Development Programme (IHSDP) kaltlanga mirethei insak tanpuina dawngtu chhungkaw 136 hnenah tanpuina sum (first installment) a sem.

Chief Minister hian insak tanpuina dawngtute chu taima leh rinawm taka an sum dawn te hmang thiam turin a chah a, Pathianin Sawrkar kaltlanga malsawmna a pekah lawm thiam turin leh tanpuina dawng ve lo te pawhin a dawngte itsik lova lawmpui nachang hre tur a a duh thu a sawi bawk. UD&PA Department changtu Minister leh Department a thawktu official te thahnemngaihna leh taihmakna fakin an thawh rah a taka hmuh tur awm hian thla a ti muang a ni a ti a, IHSDP hi miretheite tan a ruahman anih ang ngei a mirethei ten an tangkaipui ngei a beisei thu a sawi bawk.

Chief Minister chuan New Land Use Policy (NLUP) kaltlanga Sawrkarin miretheite chawikan a tumna ah chak taka hma lak anih thu sawiin chhungkaw 90000 chuang hnenah tanpuina pek anih tawh thu leh chhungkaw dang 32000 hnenah pawh pek leh anih tur thu sawiin pawisa pawh a awm sa vek tawh thu sawiin sawrkar hun tawp hma ngeiin pek zawh vek ani ang a ti bawk a ni.

UD&PA Department hmalakna pawimawh tak Integrated Housing & Slum Development Programme (IHSDP) hi JNNURM peng pakhat niin Mizoramah chuan District Headquarters khawpui paruk a mirethei chhungkaw 1950 in sak sakna tur a kalpui a ni a, heng zingah hian chhungkaw 1231 insak chu hma lak ni tawhin a last batch atan chhungkaw 719 hnenah tanpuina pek leh tur niin an zinga 136 chu Serchhip khawpui huamchhung ami te an ni.

Serchhip khawpui tan bik hian Sawrkar Laipui chuan chhungkaw 350 chenna tur insakna tur leh infrastructure siamna atan cheng nuaih 710.40 a pe a, chhungkaw 214 chenna tur in sak hna atan hma lak a ni tawhin heng zinga chhungkaw 177 te chuan an sa zo tawh a, chhungkaw 37 in tunah hian an sa mek bawk a ni. Tunah hian chhungkaw 136 tan insak tanpuina hi pekchhuah leh niin chhungkaw tin tan Rs. 1,57,888/- ruahman niin pawisa hi installment 4 in pek chhuah a ni a, vawiin ah hian 1st installment atan Rs. 59,000/- theuh pek niin hei hi insakna hmanrua, thingzai,adt. Bakah inrel hna thawh tur a ni ang. 2nd installment atan R. 59,000/- tho ruahman niin 1st installment sum hmanga thawh tur te zawh fel anih hnuah pekchhuah an ni ang a, hei hi chhuat, bang leh a chung rangva siam nan hman tur a ni ang. In sak hna zawhfel thawkhat anih hnu ah rawng hnawihna atan 3rd installment Rs. 29,888/- pek chhuah leh an ni ang a, Beneficiary ten insak hna an zawhfel hnu ah 4th installment (security) fund atan Rs. 10,000/- pekchhuah leh an ni ang. Hei bakah hian Beneficiary te chu R.. 6,300/- in sakna atan hian thawh ve tura ruahman a ni bawk.

IHSDP hnuaia mirethei in sak te hi Assam Type a sak tur niin a len zawng hia sq.metre 39 aia te lo tura ruahman a ni a, Department-in pawisa fai hi khawih lovin, Mizoram Rural Bank (Serchhip Branch) kaltlangin a pechhuak a, beneficiary te account-ah direct in a chhunglut a ni.

Vawiin a IHSDP tanpuina dawngtute hi Serchhip VC-I atangin chhungkaw 23, VC-II atanging chhungkaw 19, VC-III atangin chhungkaw 18, VC-IV atangin chhungkaw 19, VC-V atangin chhungkaw 7, New Serchhip atangin chhungkaw 28 leh Chhiahtlang atangin chhungkaw 22 an ni.

Vawiin inkhawm hi Pu Lalsangliana Addl.DC in a kaihruai a, Pu K.Lianzuala, MLA MKVIB Chairman ni bawk te, Pu Lal Rinawma IRS, Principal Secretary, Pi Juhi Mukherjee, IAS Serchhip DC, ten thu an sawi a, Pu K.Lalthawmmawia, Director UD&PA Department in keynote address pe in Pu ST Lalhmingmawia, DLAO in lawmthu sawiin hun a khar a ni.

Source: DIPR, Serchhip