DISTRICT ELECTION OFFICER IN DRAFT ROLL PUBLISH


Dated Serchhip, the 15th September, 2016: Vawiin chawhnu hian Serchhip District Election Officer Dr. Lalrozama, IAS chuan Serchhip DC Committee Room-ah nakum 2017 Electoral Roll atana hmalak bul tan nan Draft Roll for 2017 chu a tlangzarh a, Political Party hrang hrang aiawhte hnenah he Draft Roll hi a hlan nghal.

Dr. Lalrozama chuan, Election Commission of India ruahmanna angin Draft Roll 2017 chu tlangzarh a nih thu a sawi a, he Draft Roll atan hian 2016 Electoral Roll chu hman niin nakum 15.1.2017 a Final Roll dik leh felfai tak Publish a nih theih nan thun belh ngaite, siam that ngaite, paih ngaite zawnna hna thawh chhunzawm zui nghal a ni ang, a ti.

Election Officer Pu R. Vanrengpuia, MCS pawhin thu sawiin Serchhip District chhunga Polling Station siamrem ngai, District Level Standing Committee in Jt. CEO hnena dilna a thlen pawh Election Commission lamin an rawn pawm sak tawh thu sawiin lawmawm hle a a hriat thu a sawi.

Vawiina Draft Roll Publish a a lan dan in Serchhip District chhunga Assembly Constituency pathumah hian vote thlak thei mihring 46517 an awm mek a, an zinga 23675 te hi hmeichhia niin a dang 22842 te hi mipa an ni. 26- Serchhip A/C ah voters tam berin mi 16729 an awm a, 28-Hrangturzo A/C in dawtin voters 14965 an awm a, a tlem ber 27-Tuikum ah chuan mi 14823 an awm thung.

Draft Roll Publish a nih takah chuan Roll a inthun thar duh emaw sawisel duh neite tan vawiin atanga 14.10.2016 thleng dilna hun hawn zui nghal a ni a, chung dilna leh sawiselna te chu ERO leh AERO ten 16.11.2016 ral hmain an enfiah vek dawn a ni. Enfiah hnua pawm tlak leh tlingte chu 15.12.2016 hma in Election Office lamin Dt 5.1.2017 a tlangzarh hman turin an chingfel zui ang.

Roll a chuang tura dilna, hming siamrem ngai leh sawiselna hun hawn chhung hian District chhunga mipuite chu mahni awmna BLO hnen atanga a tul ang zela dilna siam tura ngen leh hriattir an ni.

Source: DIPR, Serchhip