SERCHHIP AH ZALENNA CHAMPHA VAWI 70 NA HLIM TAKIN HMANG


Dated Serchhip, the 15th August, 2016: Vawiin hian ram chhung hmun dangte rualin Serchhip ah pawh India ramin zalenna a hmuh champha phak 70 na chu hlim tak leh ropui taka hman a ni a. A lawmna pui ber Khawtetlang DC Playground a hmannaah Pu John Rotluangliana, Minister Transport Department chu khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a, zing 10:30 a.m ah Khawtetlang Playground ah khuallian hian India hnam puanzar pawtpharhin hnam puanzar chibai buktu Parade Contingent 15 te chibai bukan chu a chhanglet nghal bawk. Thu sawiin khuallian chuan, ram dang awpbehna lak atanga zalenna kan hmuh theihna tura theihtawp lo chhuahtu ram hruaitute zahna chibai a buk a. An thawhrah zalenna hlu tak chu vawiin thlengin kan ramin nasa takin kan chhawr ta zel a ni, a ti.

Mizoram leh Serchhip District chhunga hmasawnna hrang hrang te sawiin Pu John Rotluangliana chuan, ralmuang tak mipuite kan nun za theih nana theihtawp chhuah a nih avanga State ralmuang ber pawl kan nih tak thu a sawi a, zalenna hnuaiah mipuiten hmasawnna rahbi an zawh theih nan NLUP kalpui a nih thu leh Serchhip District ah pawh 1&2 Phase ah chhungkaw 6171 pek fel tawh an nih thu leh 3&4 Phase hnuaia chhungkaw 3370 tanpuina pek mek an nih thu a sawi. Tum bik neia tam zawk tharchhuah leh theihna neite rahchhuak tura beihna thar New Economics Development Policy (NEDP) Mizoram sawrkar in kumin atanga a kalpui tan thu sawiin, chumi atan chuan Annual Action Plan 2016-17 ah pawisa Vaibelchhe 250 dah a nih thu a tarlang a ni. Zirna lamah hma kan sawn zel thu sawiin khuallian chuan Serchhip Kawlritlangah pawh mi harsa zawkte tan Eklavya School kalpui tan a nih tawh thute, Serchhip Mini DIET ni thin chu DIET puitling a nih tawh thu leh zirtirtu engemawzatin an training chhuah tawh thute a sawi a. Tin, District Jail, Chhiahtlanga sak pawh tunah hawn mai theih a nih tawh thu sawii, Thenzawla AYUSH Hospital kalpui tan a nih thute a tarlang bawk. Inkalpawhna kawng tha kan neih belh zel theih nana Serchhip District chhunga kawng laih mek hrang hrangte a tarlang bawk. Heng bakah hian khuallian hian Sport lama hmasawnna atana sawrkar hmalakna te, Rel kawng lianin Bairabi a thlen tawh thu leh 2019 a Sairang thlen tir tum a nih thute leh hmasawnna hna thawh dang tam tak a tarlang bawk a ni.

Thu a sawi zawh hian khuallian hian Parade Contingent ti thate hnenah lawmman a sem nghal a, lawmman dawngtute chu hetiang hi an ni. Pakhatna Marion High School, pahnihna Government High School, Serchhip leh pathumna Government High School, Chhiahtlang te an ni.

Zalenna champha lawmna pui ber Khawtetlanga neih a nih zawh hian At Home Tea Party DC Bungalow ah neih chhunzawm a ni a, chawhnu lamah Independence Day puala Football tournament final match chu New Serchhip Football Club leh IOC Veng Football Club ten an khel nghal bawk.

Source: DIPR, Serchhip