WOMEN COMMISSION CHAIRPERSON PI VANLALAWMPUII CHAWNGTHU HOVIN THENZAWLAH INDIA INDEPENDENCE DAY VAWI 69-NA LAWM A NI


Serchhip, 15th August, 2015 : Vawiin chawhma dar 10:00 khan Thenzawl Public Playground-ah Independence Day vawi 69-na ropui taka lawm a ni a, Pi Vanlalawmpui Chawngthu, MLA, Mizoram State Women Commission Chairperson chuan khuallian niin a hmanpui.

Vawiin Thenzawl-a Independence Day lawmna ah hian March Past Contingent 8 (School Contingent-7, JNV NCC Contingent) an awm a, khuallian hian Independence Day lawmna hmun a thlen veleh hian India hnam puanzar a pawt pharh a, hemi zawh hian March Past nei tur parade contingent 12 te chu endikin March past parade contingent te hnam puanzar chibai buk a chhanglet nghal bawk a ni.

Independence Day thuchah sawitu khuallian chuan mipui pungkhawmte chibai bukin duhsakna a hlan a, Mizoram Sawrkarin kum kalta chhunga hmasawnna kawnga hma thar a lak chi hrang hrang te a tarlang a ni.

Khuallian chuan Mizoram Sawrkarin hmeichhiate dikna leh chanvo humhalh a ngaihpawimawh em avangin The Mizoram Village Council Amendment Act 2014 hmangin hmeichhiate hamthatna tur Dan a siam a, ram rorelna ah pawh hmeichhiate tan seat reserved a ni ta hial a, Village Council leh Local Council inthlanah pawh he dan thar hmang hian hmeichhia ten chanvo pawimawh tak kan chelh ve thei ta a ni a ti a, ram rorelna chungchang mai bakah Mizo dana nupui pasal inneih leh thuamchhawm chungchangah pawh The Mizoram Marriage, Divorce and Inheritance of Property Act, 2014 hmangin hmeichhiate zahawmna leh dinhmun chawisan ani leh zel bawk a, Mizoram Sawrkarin thu mai ni lova a tak ngeia hmeichhiate dinhmun a chawisan leh chanvo a siamsak avangin lawmawm a tih thu a sawi bawk.

Khuallian chuan kum kalta chhunga Thenzawl Civil Sub-Division huam chhunga Sawrkar hmalakna chi hrang hrang a tarlan zingah SDO(C) office building thar sak anih thu leh luah thuai theih anih dawn thu te, SDO(C) quarters tur leh staff quarters pakhat sak na tur pawisa ruahman fel anih tawh thu leh hna tan thuai anih dawn thu a sawilang a, Metre 1200 a thui Thenzawl Vengthar - Kanan Veng kawngpui black topping hna thawh zawh anih thu te, PMGSY scheme hnuaia Thenzawl-Zote kawng sial hna thawh mek anih thu a sawi bawk.

Sports Authority of India (SAI) Women Hockey Training Centre, Thenzawlin hlawhtlinna ropui tak tunhnaia a neih te chu chhuanawm atih thu te, Thenzawl Hockey Ground Project engemaw harsatna avanga hun rei tak chhunzawm loh a awm tawh pawh chhunzawm thuai anih tawh dawn thu a sawi a, Thenzawl Serculture Farm panna kawng pawh tun thla (August) chhunga siam zawh hman tuma theihtawp chhuah anih thu te sawiin Thenzawl handloom Complex tihchangtluna “Export Facilitation Hub” siam na tur lungphum pawh Chief Minister-in thla hmasa a a phum thu te a sawilang bawk a ni.

Khuallian hian Independence Day lawmna Day Football leh Hockey Final te a hmunah a enpui a lawmman a sem nghal a ni.

Source: DIPR, Serchhip