HOME MINISTER PU R.LALZIRLIANA HOVIN INDIA INDEPENDENCE DAY VAWI 67-NA SERCHHIP-AH LAWM A NI


Serchhip, the 15th August, 2013: Vawiin chawhma dar 10:30 khan Khawtetlang Field, New Serchhip-ah Independence Day ropui taka lawm a ni a, Pu R.Lalzirliana Home Departrment, Rural Development Department etc., changtu Minister chuan khuallian niin a hmanpui. He India ram zalenna champha lawmna niah hian March Past Contingent13 (Armed Contingent-2, Unarmed Contingent-1 leh School Contingent-10) an awm a, 14 Assam Rifles Pipe Band in India hnam hla an rem bakah March Past neih laiin rimawi an tum bawk a ni.

Minister hian Independence Day lawmna hmun a thlen veleh hian India hnam puanzar a pawt pharh a, hemi zawh hian March past nei tur parade contingent 13 te chu endikin Parade Commander Sub-Inspector H.Lalsawta, 3rd Batallion M.A.P kaihhruai March past parade contingent te chibai buk a chhanglet nghal bawk a ni.

He ni lawmnaah hian khuallian chuan India ram, zalen leh chhuanawm taka hlangkaitu zalenna sualtu leh ram tanna an nunna hlu tak hlantu te chungah zahna leh chawimawina hlan pahin thinlung takin lawmthu a sawi a. Dan leh thupek kenkawhna mimal leh pawl kuta a awm hi Sawrkarin a phal ngai dawn loh thu leh, hetianga lo ti thinte an awm anih chuan Sawrkar chu a kuangkuah mai mai dawn loh thu a sawi a, mimal zahawmna leh dikna, an chanvo humhalh kawngah Sawrkar chuan dan hnuaia a tih tur ang chu a ti zel dawn ani tih a sawi bawk.

Home Minister chuan NLUP atan kum 2012-13 chhungin pawisa cheng vaibelchhe 838.82 hmuh anih thu leh 2013-14 bik atan cheng vaibelchhe 370 sanction hmuh anih tawh thu sawiin tunah hian sem tan mek a ni a ti a, tun dinhmunah NLUP kaltlangin chhungkaw 90,139 pek an ni tawh a, 3rd Phase leh 4th Phase chhunga mi 44,861 tanpuina tur pawh September thla tir lam a semchhuah hman a ni ang a ti bawk. NLUP hi Serchhip District chhungah 2nd Installment sem mek a nih thu sawilangin, chhungkaw 3118 (Serchhip-1036, Tuikum-1076, Hrangturzo-1006) hnenah Rs. 78,041,174 /- (Vaibelchhe Sarih, Nuaih Sawmriat, Sing Li, Sang Khat, Za leh Sawmsarih Pali) sem chhuah a ni a; Third Phase atan chhungkaw 2105 (Serchhip-701, Tuikum-700, Hrangturzo-704) leh Fourth Phase atan chhungkaw 1123 (Serchhip-355, Tuikum-356, Hrangturzo-412) thlan fel tawh niin; First Phase atanga Fourth Phase thleng hian Serchhip District a chhungkaw 9401 hnenah tanpuina pek an ni dawn a ni a ti bawk.

Home Minister chuan Serchhip District a Sawrkarin hmasawnna hna kawng hrang hranga a thawh dan tarlangin, Rural Development Department kaltlangin Integrated Water Management Programme (IWMP) hnuaiah hian Serchhip District ah Project pali kalpui mek a nih thu leh, hemi atan hian pawisa Rs. 423.154 lacs hmuh tawh anih thu te; Serchhip District chhunga khaw awm zawng zawngchu IWMP hian a tuam chhuah vek dawn thu te a sawi a ni. National Rural Livelihood Mission (NRLM) Pilot Project atan kumin a tan turin Serchhip leh Kolasib District te thlan an ni a ti a, Serchhip District ah chuan Serchhip R.D. Block atanga bul tan tur a ni a ti bawk. MGNREGS hnuaiah thingtlang khaw hrang hrang te inkalpawhna leh khawchhung inkalpawhna Rural Connectivity Road Kilometre 119 laih a ni a, ramngaw chhe tawh siamthat lehna turin thingtiak 50,000 chuang zet phun a ni bawk a ti a ni.

Home Minister chuan SP Office, Serchhip ah 50 KW Solar Power Plant bun thar a nih thu leh July ni 3, 2013 atanga hman tan a nih thu a sawi a a, North Vanlaiphai Police Station Building thar tur pawh sak anih thuai dawn thu te, Serchhip khawpui chawmtu Tuikum Lui atanga Tui Pump na leh a pekchhuahna khawlte a hlui tawh avanga harsatna awm thin sut kian nan Electrict Motor leh Pump te, Booster te a thara thlak vek an nih thu te leh, Distribution Pipe Line thar siam hna thawh zawh tawh a nih thu a sawi bawk. Serchhip District chhunga khua zawng zawngah Elementary Education zirtheihna (Primary & Middle School) tun Sawrkar kum kal laiah hian pek vek an ni tawh thu te, Computer Set / Laptop Serchhip Districtchhhunga Government Middle School zawng zawngah August 2013 chhunga semchhuah hman beisei a nih thu te a sawi bawk a. Serchhip District chhunga High School la awm lohna khua Thinglian, New Serchhip-ah te hian RMSA hnuaiah School thar zak zawh tawh niin tunah hian Buangpui, Khawbel leh Sialhau- ah te High School sakna tur ruahman mek a ni a ti bawk.

Pu Zira chuan Serchhip, Lunglei, Lawngtlai, Saiha leh Champhai District te bakah Aizawl District khaw engemaw zat chawm a control mek tu, 132 kV Sub-Station, Bukpuia khawlte chu kumin April leh May thla khan Renovation & Modernization Scheme, NEC sponsored in Rs. 468 lakhs sengin a thara thlak vek an ni a ti a, khum 100 awmna District Hospital sakna tur lungphum Chief Minister Pu lal Thanhawla’n a phum fel tawh thu te; Solar Power Plant lian 100 kilowatt pe chhuak thei tur chu J.N. Hospital Serchhip-ah bun mek anih thu te a sawi a, PWD ten Chhingchhip leh Hmuntha inkar kawng a Lei an dawh leh Chhingchhip leh Thentlang inkalpawhna tur Lei an dawh tepawh kumin December, 2013 ral hma a zawhfel anih dawn thu te, Hmuntha-Khawbel kawng leh Thentlang-Sialhau kawng laih te a tul ang chu thawh zawh tawh nih tawh thu te, Chhingchhip – Hmuntha Road, Chhingchhip – Thentlang Road, Chhingchhip – Hualtu Road, Hmuntha – Khawbel Road leh East Lungdar – Sailulak Road te pawh tun thal lo awm leh tur hian Blacktop tura tender mek a nih thu te a sawi bawk.

Minister hian March Past Parade contingent te hnenah hian lawmman a sem nghal a, a titha zualte chu : Pakhatna – Lal Thanhawla Higher Secondary School, New Serchhip, Pahnihna – Marian High School, Serchhip, Pathumna – Millenium High School, Chhiahtlang te an ni a, parade contingent zawng zawng hnenah participation prize sem vek a ni. Vawiin Independence Day Parade Contingent ah hian Ex-Servicemen League ami kum 72 a upa Pu Ngurlawma, Serchhip chu telin parade ho zinga upa ber a ni.

Independence Day pual hian tukin (August ni 15) khan JNM Hospital (Poor Fund), Old Age Home, Home, Zoar Deprived Children’s Home, Adult Rehabilitation Centre leh Shalom Special School ah te Independence Day lawmna thilpek sem a ni bawk.

Independence Day pual inkhawm zawh anih hnu hian DC’s at Home chu sawmbikte tan DC Bungalow ah neih a ni

Source: DIPR, Serchhip