SERCHHIP-AH CHIEF MINISTER HOVIN “WORLD YOUTH SKILLS DAY” HMAN A NI


Serchhip, 15th July, 2015 : Vawiin chawhnu dar 2:00 khan Serchhip DC Conference Hall-ah Sub-Headquarters YMA, Serchhip buatsaihin “World Youth Skills Day” leh tun hnaia Mobile Vocational Training chhuak te hnena an hnathawhna tur hmanrua sem na hun hman a ni a, Mizoram Chief Minister Pu Lal Thanhawla, Training chhuakte hmanrua tur tum sak tu ni bawk chuan he hun hi khuallian niin a hmanpui.

Khuallian Pu Lal Thanhawla chuan thalaite fuihna thu sawiin anmahni tuina zawng taka eizawnna an hmuh theih nan thiamna bik nei tura chher puitlin hi sawrkarin a tum a, thalaite chu ram innghahna bulpui pakhat an nih bakah age-group lian ber luah tu an ni a, ram hmasawnna leh intodelhna pawh thui takin anmahni ah a innghat a ni a ti a, hei vang hian skill development pawh hi kan uar deuh deuh a tul a ni a ti bawk. Chief Minister chuan vawiin ni denchhen hian Sawrkar Laipui pawhin Skill Development atana ruahmanna thar engemawzat a chhawpchhuak dawn a, Mizo thalaite pawhin hei hi ngaihven se a duh thu sawiin thalai chhawr tlak, khawi ramah pawh chhawr theih tur “export quality” chher ngei an tum thu leh sawrkar pawhin theihtawp chhuaha hma a lak zel dawn thu a sawi bawk.

NLUP chungchang pawh sawilangin Chief Minister chuan khawvela thil thar a ni a, kan hotute hnena Pathianin remhriatna a pek kaltlanga mirethei leh harsa zawkte dinhmun siam thatna hmanrua tha tak duan chhuah a ni a, Pathian programme anih avangin malsawmin a awm a Sawrkar Laipuia hotute thinlung pawh a hneh em em a, NLUP atana sum kan dil zat aia tam min pe hial a ni a ti bawk. Hei bakah hian Pathian hriatpui programme anih miau avangin India ramchhung mai bakah UNO beng hial a thleng a, tunah hian UNO Agency lian pali lai an rawn tel ve leh tawh a, hei vang hian dikna, rinawmna leh taimakna nen he programme hi kan kalpui a ngai a ni a ti bawk. Chief Minister chuan sawrkarna an siam apianga YMA te nen thawhhona tha tak an nei ziah thin chu lawmawm a tih thu a sawi bawk a ni.

Thusawitu dang Pu T. Sangkunga, Chairman, Mizoram Youth Commission pawhin Skill Development pawimawhzia uar taka sawiin MYC hmalakna hrang hrangte a tarlang bawk a ni.

Chief Minister hian thu a sawi zawh hian May 19-June 19, 2015 a MYC leh Sub-Headquarters YMA ten Mobile Vocational Training an buatsaih a training tha taka zo mi 92 hnenah an trade thlan azira an hnathawhna tur hmanrua a sem nghal a, heng hmanraw leina atan hian Chief Minister hian ama pawisa Rs Nuaih li chuang a hmang a ni.

Chief Minister hi Pu H.Rohluna, Minister, Industries Dept., Pu Joseph Lalhimpuia, Parliamentary Secretary leh Pu T. Sangkunga, Chairman, Mizoram Youth Commission ten an tawiawm a ni.

Vawiin inkhawm hi Pu Kawlthuama, Vice President, Sub-Headquarters YMA, Serchhip in a kaihruai a, Pu lalsawmzuala, Superintendent, MYC in report pe in, Pu C.Lalhminghlua, Chairman, Education & Youth Affairs Sub-Committee in lawmthu sawina hun hmangin hnu a khar a ni.



Source: DIPR, Serchhip