ADHAAR NUMBER LEH BANK ACCOUNT NUMBER THLUN ZAWM VEK TUR


Dated Serchhip, the 15th March, 2017: Vawiin hian Serchhip DC Pisaah Bawrhsap Dr. Lalrozama, IAS hovin Pu R. Ralkhuma, Chief Manager, Lead Bank leh District chhunga Bank hrang hrang Manager leh mi pawimawh ten Adhaar Number leh Bank Account Number thlunzawm chungchanga Campaign neih dan tur relin Special District Level Consultative Committee an nei.

Dr. Lalrozama chuan, sawrkar laipuiin ram mipuite chu Adhaar nei vek tur leh an Adhaar number leh an Bank Account Number te thlunzawm vek turin a duh a. Hei hi bank kaltlanga sawrkar tanpuina tinreng inpek nan leh ram chhung sum chevel fel zawka kalpuina atana tih a ni, a ti a. Adhaar Number nei tawhte chuan a rang lama hei hi an tih a tul a ni, a ti. Adhaar enrolment kalpui mek dan pawh sawiin Dr. Lalrozama chuan, tunah hian Team pathum tirhchhuah mek an ni a, Team pakhatin DC Office ah ngawrh takin an kalpui mek bawk a, March thla chhungin a tam thei ang ber Adhaar enrolment hi pek hman kan tum a ni, a ti bawk.

Pu Ralkhuma, Chief Manager, Lead Bank chuan, mipuiten an Adhaar Number leh Bank Account Numberte an thlunzawm vek a tul avangin Bank lama thuneitu sang zawkin Bank te chu khawtina mipuite hnena a hrilhhriatna (Awareness Camp) nei turin min beisei a. Serchhip District ah pawh tun March thla chhungin khawtinah neih hman kan tum dawn a ni, a ti.

Vawiina meeting ah hian District chhunga Bank hrang hrangten an tlawh tur khua leh an tlawh hun turte an ruahman nghal a ni.

Adhaar leh Bank Account inthlunzawm nan hian mahni account neihna branch ah inthlunzawm tir phalna Form (consent Form) dahkhah (fill up) a thehluh mai tur a awm a, chumi hmang chuan awlsam takin Adhaar Number nei tawhte tan tihfel mai theih a ni. Amaherawh chu Bank Account-a kan hming ziak dan leh Adhaar Card-a kan hming ziak dan a inan loh chuan thlunzawm theih a ni lo thung a, hetiang harsatna nei chuan hming siamthat awlsam zawkna, bank account hming kha thlak/siamthat hmasak phawt thin tur a ni ang.

Source: DIPR, Serchhip