SERCHHIP-AH "WORLD CONSUMER RIGHTS DAY,2016" HMANG


Serchhip, 15th March, 2016 : Serchhip District Consumers Association hmalakna in vawiin khan Serchhip DC's Conference Hall-ah "Antibiotic Resistance" thupuia hmangin "World Consumer Rights Day, 2016" hman a ni a, he hun hi Serchhip District Bawrhsap Dr. Lalrozama, IAS chuan khuallian niin a hmanpui a, Serchhip District chhunga Consumer Association Branch hrang hrang aiawhte, khawtual mi sawm bikte leh sawrkar hnathawk sawm bikte bakah Bank, Petrol Pump leh MIZOFED aiawhte telin Government Serchhip College zirlaiten he hun hi an chhim bawk a ni.

Khuallian Dr. Lalrozama chuan thusawiin antibiotic hi khawvelin a hmang uar em em a, siam chhuah chi hrang hrang tamtak awm tawhin siam tura research beih mek ani reng bawk a, antibiotic khawvelin kan neih mek te hi mipuiten kan hmang nasa em em a, chutih rualin hmang diklo hi za a sawmnga chuang kan ni tih mithiamten an zirchianna ah an hmuchhuak a, antibiotic kan damna tura kan ngaih hi kan natna, min tichhetu anih chang a tam ta hle a ni a ti a, Hospital leh damdawi dawr hrang hrang atanga mihringte natna tawh azira antibiotic kan lei piah lamah hian Thlai leh Theirah bakah ran enkawlna ah te antibiotic hman a lo ni leh zel ta hi thil pawi tak a ni a ti a, antibiotic upa ber 'penicillin' pawhin natna tihdam theih a neih tlem tak zia sawilangin Bawrhsap chuan ran vulhte an thau that a an taksa a than chak theih nan te, thlai leh theirah an hmin hma a hlawk zawka tharchhuah duhna avang te in antibiotic pek ani thin a, hei hian kan taksa in a haw thin a, harsatna chi hrang hrang min siam sak thin a, mipuite pawh kan thanharh a kan tanrual a ngai a, ran leh thlai enkawltute pawh hetiang kawngah hian nasa lehzual an fimkhur a tul a a hriat thu a sawi bawk.

Vawiin "World Consumer Rights Day, 2016" pual inkhawm hi Pu RL Chhuanawma, Vice-President, SDCA in a kaihruai a, Pu H.Zonuntluanga, President, SDCA in Consumer Rights sawifiahna leh hrilhfiahna hun a hmang a, Pu Rosangmawia, DCSO, Serchhip in Food Security chungchang sawifiahna leh Serchhip dinhmun sawifiahna hun hmangin Pu Laldinpuia, Secretary, SDCA in kum 2015-2016 chhunga SDCA hmalakna report a pe bawk a, zawhna leh chhanna hun hman a ni bawk.

Tun dinhmunah DCSO, Serchhip huam chhungah mihring 84417 awm mekin Food SecurityAct , hnuaia tanpuina dawng thei hi 49034 (Rural-34493, Urban-14541) an awm a, Serchhip District a thla tin a buhfai mamawh zat chu 6909.20 Quintals a ni.

Source: DIPR, Serchhip