SERCHHIP AH CHAPCHAR KUT HMAN DAN TUR REL


Dated Serchhip, the 15th February, 2017: Vawiin hian Serchhip DC Committee Room ah Bawrhsap Dr. Lalrozama, IAS hovin Chapchar Kut 2017 hman dan tur an rel a. Chapchar Kut 2017 hman ni tura ruat lawk March ni 3 ah harsatna a awm dawn avangin Serchhip ah chuan March 24 a hman mai ni se tiin ruahmanna an siam.

Chairman Dr. Lalrozama, IAS chuan kan hnam zia leh nunphung thate, kan tu kan fate hnena hlan chhawng zela zirtir zel tur kan ni a, hnama min siamtu Pathian hre renga he hnam hi kan chawi nun zel a tul a ni. Chapchar Kut chu chutiang thil tihna hun remchang ber pakhat a ni, a ti a. Serchhip mipuite a tam thei ang ber an tel theihna tur leh naupangten pipute zai, lam leh nun dan mawi tinreng zirthiamna hun tha atana an hman theih ngeina tur Kut buatsaih ngei a tul thu a tarlang a ni.

He meeting-ah hian Sub Headquarters YMA leh Sub Headquarters MUP lam ten rawtna an thlen angin a hun atana lo ruat lawk March ni 3 a hmang turin Serchhip-ah harsatna a awm nia hriat a ni a. Serchhip-a Chapchar Kut hmanna thin, khawchhung lailia Playground, Leisekawt Field chu Presbyterian Kohhran Hmeichhe Khawmpui lian March 9-12 chhunga neih tur atana Pandal sak a nih tawh vang leh Hmar Venga Playground chu Sport Complex atana sak mek (under Construction) a nih vang te, Khawtetlanga DC Playground chu mipui nunau tan leh veng thenkhat tan a hlat bawk si vangte; tin Serchhip mipuite Kohhran Hmeichhe Khawmpui lian atana an inbuatsaih vanglai a nih vangte a ni a. Heng thilte hi ngun taka ngaihtuah a nih hnuin member kalkhawmte chuan a hun hi March ni 24 a sawn nise, a hmanna hmun atan Leisekawt Field ni se tiin a rel ta a ni. A tul anga sawrkar thuneitu sang zawk te lo dawr zui turin Deputy Commissioner chu ngen a ni.

Vawiina meeting hian a hmanna hmun tur Leisekawt Field ruahman dan tur leh chanvo hrang hrang changtu turte a ruat a, programme kimchang erawh chu Sub-Headquarters YMA kutah hlanin naupang lam (YMA Chhang) ten a tam thei ang ber chanvo an neih theih dan tur ngaihtuah chunga a hman dan tur duan nise tiin an rel a. Sub Headquarters MUP leh MHIP lam pawh Chapchar Kutah hian chanvo engemawzat nei tura beisei an ni bawk.

Vawiina meeting ah hian Addl. DC Pi Zosangzuali Pachuau leh District Officer pawimawh thahnem tak an tel a, YMA aiawh te, Chanchinbumi te, MUP leh MHIP aiawh bakah khawtlang hruaitu thahnem tak an tel a ni.

Source: DIPR, Serchhip