SERCHHIP BAWRHSAP HOVIN EVM DAHNA STRONG ROOM HAWN A NI


Serchhip, 15th January, 2016 : Election Commission of India in phalna a pek angin vawiin chawhma dar 11:45 khan Serchhip District Bawrhsap Dr. Lalrozama, IAS District Election Officer ni bawk kaihhruaina hnuaiah Serchhip DC Office a EVM dahna Strong Room chu hawn a ni a, he hunah hian Tlawmngai Pawl hrang hrang leh Political Party hrang hrangte sawm niin Political Party te zingah Indian National Congress chiahin aiawh an tir a, political party dang te chuan aiawh tirh tur an neih remchan loh thu sawiin EVM Strong Room hawn chungchangah engmah sawisel an neih loh tur thu an sawi bawk a ni.

Dr. Lalrozama chuan kum 2013 a Mizoram State Legislative Assembly inthlan neih anih tuma hman Electronic Voting Machine chungchanga thil diklo awm ni a hria ten Guwahati High Court ah an lungawilohna an thlen avangin hun engemaw chen chu EVM te hi khawichet theih loh in a awm a, nikum kum tawp lama High Court in EVM chungchang thu thehluh a ngaihtuah hnu in thu tlinglo ah a ngaih thu a sawi hnuah ECI chuan EVM dahna strong room te hawn phalna leh data record awm te nuai reh phalna thupek a tichhuak ta a, High Court thutlukna te Supreme Court lama appeal anih thu hriat anih zui tak loh hnu ah EVM dahna strong room te chu hawn anih tak thu a sawi a ni.

EVM dahna Strong Room hawn anih hian tlawmngai pawl aiawhte, MJA aiawhte leh political party aiawh kal khawmte chu an duh ang taka EVM te enchiang tur leh zawhna an neih te zawtfiah tura hriattir an ni a, anni hian engmah sawisel leh sawi buai tur awma an hriat loh thu an sawi a ni.

Serchhip Strong Room-ah hian ECIL siam EVM 115 a awm a, District Bawrhsap kaihhruaina hnuaiah a remchan dan anga EVM a data awm te hi nuaireh chhunzawm tur a ni ang.

Source: DIPR, Serchhip