MIZORAM STATE ANTI-TOBACCO DAY VAWI 3 NA SERCHHIP AH HMAN ANI


Dated Serchhip, the 14th September, 2016: Vawiin hian Serchhip District I&PR Conference Hall ah Mizoram State Anti-Tobacca Day vawi thumna chu District Anti-Tobacco Squad buatsaiha hman a ni a, Bawrhsap Dr. Lalrozama IAS chu khuallian a ni.

Dr. Lalrozama chuan, kan ram hian zuk leh hmuam avang hian a chan nasa tawh lutuk a, kan mualpho pui mek a ni. Hman lai kha chuan kan pi leh puten an hnathawhna lamah zuk leh hmuam tih tul nia hriatna an lo nei tawh thin pawh a ni mai thei a. Amaherawh chu vawiina thangthar te hi chuan zuk leh hmuam tih chhuanlam tur aiin tihloh chhuanlam tur kan ngah tawh zawk a ni, a ti. Zuk leh hmuama kan ram a fihlim theih nan sawrkar hnathawk zawng zawngte, zirna in neitu leh enkawltute, zirlai pawl leh tlawmngaipawlte, kohhran hotute zawng zawng te chu thawhpuiah a sawm a ni.

Khuallian hian he Day denchhen a Serchhip College naupangte tana Poster Making Competition buatsaiha a ti tha mi palite hnenah lawmman a sem nghal bawk.

Inkhawmah hian Dr. K. Lallawmzuala, District Nodal Officer, NTCP chuan report a pe a, Serchhip District ah Anti-Tobacco Cell hi kumin March thla atang maia din a nih thu leh chuti chung pawha fak tlaka hna an thawh hman thu tarlangin, March thla atanga vawiin inkarah School 31 ah naupang 1913 hnenah leh Kohhran/NGO 14 a mi 1093 te hnenah Campaign an neih tawh thu te, Tobacco Cessation Clinic ah mi 227 Counselling pek an nih tawh bakah an zinga mi 29 chuan an nghei phah thute, Anti-Tobacco Squad Drive vawi 21 zet an neih tawh thute a tarlang a. MP Model Village Khawlailung leh MLA Model Village Buangpui khuate chu Tobacco Free Village a nih theih nana hmalak mek a nih thu leh Legal Metrology Department te nena tangkawpa vawi engemawzat dan phal loh Cigrattee zuartute vai an nih tawh thute tarlan a ni.

Anti-Tobacco Day hi District Squad member Secretary leh Chief Medical Officer ni bawk Dr. Laldawngliana Sailovin a kaihruai a, Anti-Tobacco Day hman a nih chhan leh a pawimawhna te a tarlang ani. Tin, Dr Zohmingsanga, Consultant NTCP, Serchhip Anti-Tobacco Cell kaihhruaiin kalkhawmten Day pual Thutiam (Pledge) an sawi rual bawk. Kumina Anti-Tobacco Day thupui atan hian "VAIHLO ZUK LEH HMUAM TEL LO THANGTHAR" tih chu thlan a ni.

Day hmanna inkhawm neih zawh hian I&PR Office tualah tunhnaia Legal Metrology Department ten Contraband Cigarette Packaged Commodity Rules 2011 bawhchhia tute hnen atanga an man khawm Foreign Cigarette Pack 1548, a tlawm thei ang bera chhuta Rs. 46440 man chu Prominent Citizen Pu K. Chawiliana kaihhruaiin tih ral a ni bawk. Cigarette te hi Secondhand Smoking pawh a hlauhawm avangin halral phal a ni tawh lova, tuia leih huhin chu chu Garbage bag ah an dah a, Garbage Disposal Area (Keitum Road) ah paih thin a ni.

Source: DIPR, Serchhip