SAGY PROGRAMME HNUAIAH KHAWLAILUNG MP MODEL VILLAGE AH AH&VETY IN VAWKTE SEM


Serchhip, 14th August, 2015 : AH&Vety Department, Serchhip District chuan an bial chhunga Lok Sabha MP Pu CL Ruala’n Model Village a siam tura a thlan Khawlailung khaw hmasawnna tura ruahmanna siam “Village Development Plan” tihhlawhtlinna kawng khat atan RKVY Scheme kaltlangin nimin chawhnu dar 2:30 khan Khawlailung BNRGSK Hall-ah Vawk note an sem a, hemi rual hian vawk vulhtute tan training an buatsaih nghal a ni.

He hunah hian beneficiary chhungkaw 15 hnenah vawk note 15 (a pa-3, a nu-12) vulh pun tur pek an ni a, Vawk note sem te hi vawk chi tha AH&Vety Farm, Lungpuizawl, Lunglei atanga lak an ni a, beneficiary te hi intiamkamna thu ziah tir vek an ni bawk. Vawkte te hi remchang hmasa berah AH&Vety Department in a vulhna hmunah kalchilh in vaccine an pe ang a, nimin hian an damdawi mamawh rulhlut hlo, vitamins etc. a thlawna pek nghal an ni bawk.

Nimin vawkte sem programme ah hian chhungkaw 11 hnenah vawk chaw man tlawma lei theihna tur “Pig Ration Card” hlan an ni a, he Pig Ration Card hi Vawkpui/Vawkpa chithlahtu a engemaw zawk zawk pahnih chin tal (vawkpa leh vawkpui pakhat ve ve vulh pawh telin) vulhtu te hnenah pek theih a ni a, he ration card neitu hian Sawrkar Approved retailer hnenah vawkpui/vawkpa pakhat tan thla tin vawk chaw kg 90 zel a chhutin a vawkpui/vawkpa vulh te tan a man tlawmin a la thei dawn a ni.

Nimin Vawkte sem inkhawm kaihruaitu Dr. Lalnghinglova, DVO, Serchhip chuan SAGY (MP Model Village) atan hian a hranpa a sum dah a awm lova, amaherawhchu he Programme in a phut angin heng model village atana thlan te hi Central Scheme hrang hrang hnuaiah ngaihpawimawh hmasak tura tih an ni a; hei vang hian RKVY hnuaiah pawh hmalakna hmasa atan hman an ni a ti a, Dr. Lalsanglien ralsun, VO, Serchhip hnen atangin vawk vulh dan leh enkawl dan inzirtirna ngaihthlak a ni bawk.

Source: DIPR, Serchhip