St. PETERS HIGHER SECONDARY SCHOOL, CHHINGCHHIP-AH Er. C. LIANTHANGPUIA HRIATRENGNA PROFICIENCY AWARD FOR HSLC SEM A NI


Serchhip 14th July, 2015 : Vawiin chawhma dar 10:00 khan St.Peter's Higher Secondary School,Chhingchhip-ah 2nd Er.C.Lianthangpuia Award for Proficiency in HSLC 2015 semna neih a ni a, Pu Hmingdailova Khiangte,Parliament Secretary, Govt of Mizoram chu khuallian a ni. Vawiin a Er.C. Lianthangpuia hriatrengna 'Proficiency Award for HSLC' semna inkhawmah hian Brother Paulose, Principal,St.Peter's HSS in inlawmna thu a sawi a, khuallian hian kum 2015 a HSLC Examination-a St.Peter's HSS atanga Topper Lalthlamuani d/o Lalthlamuana, Chhingchhip leh Govt High School,Chhingchhip atanga topper Lalremtluanga S/o Lalthantluanga te hnenah pawisa fai Rs 3500 leh Lawmpuina Thuziak a hlan a ni.

Khuallian Pu Hmingdailova Khiangte, Parliament Secretary chuan zirlaite hmaah thusawiin, Chhingchhip khua chu Kut hnathawk nasa leh zirna ngaisang khua an nih avangin a ngaihsan thu a sawi a, ramin harsatna chi hrang hrang kan tawh chhohna te tifel a, hmalam panpuitu tur chutuna zirlaite annih thute, zirlaite chu chhungkua, ram leh hnamte nghahfak annih thu a sawi a. Zirtirtute pawhin eizawnnan ringawta hmang lova, tihtakzetna leh thahnemngaihna nena zirtir hna thawk thin turin a chah a, All India Civil Service Examination-a Mizote kan lang tlem thin lutuk chu pawi a tih thu a sawi. Hri hlauhawm tak pakhat Mental Corruption-in Mizote min run mek thute sawiin, Pi Sangthanmawii w/o Er. C.Lianthangpuia(L) in a pasal hriatreng nana zirna lam hawi leh zirlaite tiphur thei zawnga lawmman a buatsaihsak thin chu lawmawm a tih thu a sawi bawk.

He hunah hian Pi Sangthanmawii w/o Er. C.Lianthangpuia(L) leh Lalrinpuia Ralte,Secretary, Chhingchhip Welfare te pawhin thu an sawi a, Pu Francis Lalhmangaiha, Teacher Govt H/S Chhingchhip in lawm thu sawina a nei bawk.

St.Peter's Higher Secondary School Chhingchhip hi kum 1962 khan Roman Catholic Kohhran ten lo dinin, tunah hian thawktu mi 32 an awm mek a ni.

Er.C Lianthangpuia Award for Proficiency in HSLC hi kum 2014 atang khan zirlai tithate hnenah sem chhoh tan a ni a,

Er.C.Lianthangpuia hi kum 1963 ah a piang a, Chhingchhip khawchhuak niin, St. Peter's Higher Secondary School atanga zir chhuak niin July 27th ,2013 khan chatuan ram a pan tawha, amah hraitrengna 'Proficiency Award ' hi kum 2014 atang kum tin an nei chho zel a ni.

Source: DIPR, Serchhip